បាល់ទាត់៖ ក្រុមការពារតំណែងជើងឯកបឹងកេត បានរក្សាការប្រដេញពិន្ទុពីក្រោយក្រុមកំពូលតារាង ១ពិន្ទុដដែល បន្ទាប់ពីបន្ដយកឈ្នះសមាគមកីឡាបាល់ទាត់កងយោធពលខេមរភូមិន្ទ ដោយលទ្ធផល ១-០ ក្នុងជំនួបជើងទី២ នៃលីគកំពូលកម្ពុជានៅកីឡដ្ឋានស្ដាតចាស់ កាលពីល្ងាចថ្ងៃទី២៣ ខែកញ្ញា ឆ្នាំ២០២១។
ជំនួបដ៏ជក់ចិត្តនេះ ក្រុមទាំងពីរបានបើកការវាយសម្រុកគ្នាពេញ ៩០នាទី ពិសេស ២នាទីដំបូងនៅដើមវគ្គទី១ ក្រុមម្ចាស់ផ្ទះកងយោធពលខេមរភូមិន្ទបានដាក់សម្ពាធ និងមានឱកាសទាត់ ៣លើកដោយខ្សែប្រយុទ្ធ Timothy ២ដង និង ញាណ សុស៊ីដាន ម្ដង តែធ្វើមិនបានសម្រេចឡើយ ក្រោយមានការជួយសង្គ្រោះរបស់អ្នកចាំទី ហ៊ុល គឹមហ៊ុយ។ ចូលវគ្គទី២ ក្រុមទាំងពីរនៅតែបន្ដគ្រប់គ្រងបាល់ប្រហាក់ប្រហែលគ្នា រហូតដល់នាទី៧០ ទើបមានគ្រាប់បាល់កើតឡើង ដែលជាការតែតបញ្ចូលទីរបស់ខ្សែប្រយុទ្ធបឹងកេត សៀង ចន្ធា ក្រោយទទួលការបញ្ជូនបាល់ដ៏ល្អពីមិត្តរួមក្រុម ឱ ភារុណ ហើយក៏ជាគ្រាប់បាល់ជ័យជម្នះផងដែរ បន្ទាប់ពីក្រុមលោក Lee Tae Hoon ព្យាយាមវាយបកនៅរយៈពេល ២នាទីចុងក្រោយតែធ្វើមិនបានសម្រេច។
ជ័យជម្នះនេះបានធ្វើឲ្យក្រុមបឹងកេតរំកិលពីលេខ៥ ទៅឈរលេខរៀងទី៣ បណ្ដោះអាសន្ន គិតត្រឹមសប្ដាហ៍ទី១៥ ដោយមាន ៣០ពិន្ទុក្នុងដៃតាមពីក្រុមកំពូលតារាងព្រះខ័នរាជស្វាយរៀង និងភ្នំពេញក្រោនដែលមាន ៣១ពិន្ទុ បន្ទាប់ពីក្រុមនាគខៀវប្រកួតបាន ១៤លើកឈ្នះ ១០ និងចាញ់៤។ រីឯការបរាជ័យក្នុងដីលើកដំបូងបានធ្វើឲ្យក្រុមកងយោធពលខេមរភូមិន្ទ កាត់បន្ថយឱកាសប្រជែងពានបន្ទាប់ពីឆ្លងកាត់ ១៤ប្រកួតដូចគ្នាឈ្នះ៦ ស្មើ៤ និងចាញ់៤ ទើបរកបាន ២២ពិន្ទុប៉ុណ្ណោះ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
