ប្រធានគណៈកម្មាការអឺរ៉ុប លោកស្រី Ursula von der Leyen បានបង្ហាញអំពីក្រុមដែលរង់ចាំជាយូរមកហើយសម្រាប់គណៈកម្មការអឺរ៉ុបថ្មី នៅទីក្រុងស្ត្រាស់បួរ (Strasbourg) ប្រទេសបារាំង កាលពីថ្ងៃអង្គារ បន្ទាប់ពីមានការចរចាជាច្រើនសប្តាហ៍ ជាមួយរដ្ឋសមាជិកជុំវិញបេក្ខជន និងផលប័ត្ររបស់ពួកគេ។

លោកស្រី von der Leyen បាននិយាយនៅក្នុងសន្និសីទសារព័ត៌មានថា «រួមគ្នា យើងកំណត់អាទិភាពស្នូល»។ លោកស្រី von der Leyen បាននិយាយនៅក្នុងសន្និសីទសារព័ត៌មានថា វា ត្រូវបានបង្កើតឡើងជុំវិញវិបុលភាព សន្តិសុខ និងលទ្ធិប្រជាធិបតេយ្យ។

ក្នុងចំណោមមុខតំណែងចំនួន២៧ នៅក្នុងស្ថាប័នដែលត្រូវបានស្នើឡើង ៤០ភាគរយត្រូវបានកាន់កាប់ដោយស្ត្រី ដែលមានអនុប្រធានប្រតិបត្តិចំនួន៦នាក់ ក្នុងនោះ៤នាក់ជាស្ត្រី។

លោក Stephane Sejourne របស់ប្រទេសបារាំង ត្រូវបានតែងតាំងជាអនុប្រធានប្រតិបត្តិ ដែលពិនិត្យមើលយុទ្ធសាស្ត្រឧស្សាហកម្ម បន្ទាប់ពីលោក Thierry Breton ជាអ្នកតែងតាំងដំបូងរបស់បារាំងសម្រាប់គណៈកម្មការអឺរ៉ុបថ្មី ដែលបានលាលែងពីតំណែងកាលពីថ្ងៃចន្ទ។ ការលាចេញពីតំណែងរបស់ លោក Breton ធ្វើឡើងបន្ទាប់ពីមានជម្លោះសាធារណៈជាច្រើន ជាមួយលោកស្រី von der Leyen ។

កាលពីសប្តាហ៍មុន ប្រទេសស្លូវេនី ក៏បានដាក់បេក្ខភាពថ្មីសម្រាប់គណៈកម្មការអឺរ៉ុបផងដែរ បន្ទាប់ពីបេក្ខភាពដំបូងរបស់ខ្លួន លោក Tomaz Vesel បានដកខ្លួនចេញ។ លោក Vesel បានលើកឡើងពីការមិនចុះសម្រុងគ្នាជាមួយនឹងចក្ខុវិស័យរបស់លោកស្រី von der Leyen ចំពោះរបៀបដែលគណៈកម្មការ នឹងដំណើរការ។

គណៈកម្មាការ ដែលបានស្នើឡើងនឹងត្រូវប្រឈមមុខនឹងការត្រួតពិនិត្យតឹងរ៉ឹង ក្នុងប៉ុន្មានសប្តាហ៍ខាងមុខនេះ ខណៈសមាជិកសភាសហភាពអឺរ៉ុប ត្រូវតែអនុម័តការតែងតាំងនីមួយៗ។