នគរបាលអូស្ត្រាលី នៅថ្ងៃពុធ (ទី១៨ ខែកញ្ញា) នេះ បានចោទប្រកាន់បុរសម្នាក់ពីបទបង្កើត និងគ្រប់គ្រងកម្មវិធី (អេប) ផ្ញើសារ ដែលប្រើប្រាស់ដោយបណ្តាញឧក្រិដ្ឋកម្មចាត់តាំងជាសកល ដោយនេះជាករណីដំបូងនៅក្នុងប្រទេសនេះ។

បុរសអាយុ ៣២ឆ្នាំ ត្រូវបានចាប់ខ្លួនដោយនគរបាលសហព័ន្ធ នៅភាគខាងលិចទីក្រុងស៊ីដនី កាលពីថ្ងៃអង្គារ (ទី១៧ ខែកញ្ញា)។ ជននោះបានបង្ហាញខ្លួននៅតុលាការ នាថ្ងៃពុធនេះ ដោយត្រូវចោទប្រកាន់ពីបទប្រព្រឹត្តិបទល្មើសចំនួន ៥ករណី ពាក់ព័ន្ធនឹងកម្មវិធីផ្ញើសារឈ្មោះ Ghost ដែលនគរបាលបានចោទប្រកាន់ថា ត្រូវបានប្រើប្រាស់ដោយក្រុមជនអន្ធពាល និងក្រុមឧក្រិដ្ឋកម្មចាត់តាំងជាច្រើន នៅតំបន់មជ្ឈិមបូព៌ា អូស្ត្រាលី និងកូរ៉េខាងត្បូង ដើម្បីនាំចូលគ្រឿងញៀន និងបញ្ជាសម្លាប់។

នគរបាលបាននិយាយថា នេះជាលើកទី១ ហើយ ដែលមនុស្សម្នាក់មានមូលដ្ឋាន នៅប្រទេសអូស្ត្រាលី ត្រូវបានចោទប្រកាន់ពីបទបង្កើត និងដំណើរការកម្មវិធីឧក្រិដ្ឋកម្មសកល។

នគរបាលបានធ្វើការវាយឆ្មក់ ក្នុងរយៈពេល ២ថ្ងៃ នៅក្នុងរដ្ឋ និងដែនដីចំនួន៤ របស់អូស្ត្រាលី ក្នុងខែនេះ ដោយការស្វែងរកពាក់ព័ន្ធ ក៏កើតមានផងដែរ នៅក្នុងប្រទេសអៀរឡង់ អ៊ីតាលី ស៊ុយអែត និងកាណាដា។

នគរបាលបាននិយាយថា ជនល្មើសអូស្ត្រាលីរហូតដល់ទៅ ៥០នាក់ដែលត្រូវបានចោទពីបទប្រើប្រាស់កម្មវិធី Ghost ក៏កំពុងប្រឈមមុខនឹងការចោទប្រកាន់ដែរ ក្នុងនោះរួមទាំងការកាត់ទោសដាក់ពន្ធនាគារផងដែរ ដោយការចាប់ខ្លួនបន្ថែមទៀត នៅក្នុងប្រទេសអូស្ត្រាលី និងនៅបរទេស ទំនងជាមានក្នុងរយៈពេលប៉ុន្មានថ្ងៃខាងមុខនេះ៕