នាយករដ្ឋមន្ត្រីហ្ស៊កហ្ស៊ី លោក អ៊ីរ៉ាក់លី កូបាគីដេ (Irakli Kobakhidze) បាននិយាយនៅក្នុងកិច្ចប្រជុំជាមួយឯកអគ្គរដ្ឋទូតអាមេរិក លោក រ៉ូប៊ីន ដាន់នីហ្គែន (Robin Dunnigan) ថា ប្រទេសហ្ស៊កហ្ស៊ី អាចពិចារណាឡើងវិញនូវទំនាក់ទំនងរបស់ខ្លួន ជាមួយសហរដ្ឋអាមេរិក ប្រសិនបើទីក្រុងវ៉ាស៊ីនតោន ដាក់ទណ្ឌកម្មបន្ថែមទៀត។

ការិយាល័យនាយករដ្ឋមន្ត្រី បាននិយាយនៅក្នុងសេចក្តីថ្លែងការណ៍មួយបន្ទាប់ពីកិច្ចប្រជុំនេះថា ទណ្ឌកម្មពីមុន បាននាំឲ្យសហរដ្ឋអាមេរិកឈានដល់«ចំណុចសំខាន់មួយ»។

សេចក្តីថ្លែងការណ៍ បាននិយាយថា៖«ការសម្រេចចិត្តបែបនេះ ប្រហែលជានឹងជំរុញឲ្យមានការពិនិត្យឡើងវិញនូវគោលជំហររបស់ហ្ស៊កហ្ស៊ីលើទំនាក់ទំនងហ្សកហ្ស៊ី-សហរដ្ឋអាមេរិក»។

កាលពីថ្ងៃទី ១៦ ខែកញ្ញា ក្រសួងការបរទេសសហរដ្ឋអាមេរិក បានប្រកាសដាក់ទណ្ឌកម្មលើជនជាតិហ្ស៊កហ្ស៊ីចំនួន ៤នាក់ ជុំវិញការចោទប្រកាន់ពីបទរំលោភសិទ្ធិមនុស្ស។ ការដាក់ទណ្ឌកម្មនេះ បានអនុវត្តចំពោះប្រធាននាយកដ្ឋានកិច្ចការពិសេសរបស់ក្រសួងមហាផ្ទៃគឺ លោក ហ្សេវីយ៉ាដ ខារ៉ាហ្ស៊ីសវីលី (Zviad Kharazishvili) ជាអនុប្រធានរបស់លោក និង«មេដឹកនាំក្រុមជ្រុលនិយមពីរនាក់ផ្សេងទៀត»។ សហរដ្ឋអាមេរិក ក៏បានដាក់កំហិតទិដ្ឋាការលើជនជាតិហ្ស៊កហ្ស៊ីជាង ៦០នាក់ ក្នុងនោះមានមន្ត្រីជាន់ខ្ពស់ អ្នកជំនួញ    មន្ត្រីអនុវត្តច្បាប់ និងសមាជិកសភា។