អង្គការឃ្លាំមើលសិទ្ធិមនុស្ស (HRW) នៅថ្ងៃពុធ (ទី១៨ ខែកញ្ញា) នេះ បានឲ្យដឹងថា ក្រុមជីហាត នៅប្រទេសបួគីណាហ្វាសូ បានបង្កើនការវាយប្រហារលើជនស៊ីវិល ដែលជារឿយៗជាការសងសឹក ប្រឆាំងនឹងសហគមន៍ ដែលបដិសេធមិនចូលរួមក្នុងជួររបស់ពួកគេ ឬត្រូវបានចោទប្រកាន់ថា បានរួមដៃជាមួយកងទ័ពរដ្ឋាភិបាល។

គួរបញ្ជាក់ថា ប្រទេសអាហ្រ្វិកខាងលិចដែលដឹកនាំដោយរបបយោធា បាននិង កំពុងប្រយុទ្ធជាមួយពួកបះបោរអ៊ិស្លាម ដែលក្រុមខ្លះមានទំនាក់ទំនងជាមួយក្រុមអាល់កៃដា និងរដ្ឋអ៊ិស្លាម ចាប់តាំងពីពួកគេបានរាលដាលចូលទៅក្នុងដែនដីរបស់ប្រទេសនេះពីប្រទេសជិតខាងម៉ាលី កាលពីជិត ១ទសវត្សរ៍មុន។

ម្រមុខយោធា លោក Ibrahim Traore បានជំរុញឲ្យជនស៊ីវិលដើរតួនាទី ក្នុងការប្រយុទ្ធប្រឆាំងនឹងការបះបោរ ដោយជ្រើសរើសជំនួយកងទ័ពស្ម័គ្រចិត្តរាប់ពាន់នាក់ ដែលគេស្គាល់ថា ជា VDP ហើយថ្មីៗនេះ តម្រូវឲ្យជនស៊ីវិលជីកលេណដ្ឋានការពារ។

ហើយអង្គការឃ្លាំមើលសិទ្ធិមនុស្ស (HRW) បានរកឃើញថា ពួកជីហាដ បាន និងកំពុងសងសឹកដោយការវាយប្រហារយ៉ាងសាហាវទៅលើជនស៊ីវិលកាន់តែខ្លាំងឡើងៗ។ ស្ថាប័នឃ្លាំមើលនេះបានចងក្រងឯកសារនៃការវាយប្រហាររបស់ពួកជីហាដចំនួន ៧លើក នៅចន្លោះខែកុម្ភៈដល់ខែមិថុនា ដែលនាំឲ្យជនស៊ីវិលយ៉ាងហោចណាស់ ១២៨នាក់ ស្លាប់។ ពួកបះបោរបានកំណត់គោលដៅលើភូមិ ជំរុំជនភៀសខ្លួន និងអ្នកគោរពបូជា នៅវិហារកាតូលិក៕