ការសិក្សាមួយដែលបានចេញផ្សាយ កាលពីថ្ងៃអង្គារ (ទី១៧ ខែកញ្ញា) បានឲ្យដឹងថា សារធាតុគីមីជាង ៣.៦០០ប្រភេទ ដែលប្រើក្នុងការវេចខ្ចប់ ឬរៀបចំអាហារ ត្រូវបានរកឃើញនៅក្នុងខ្លួនមនុស្ស។

អ្នកដឹកនាំការសិក្សាស្រាវជ្រាវមកពីមូលនិធិវេទិកាវេចខ្ចប់អាហារ ដែលជាអង្គការមិនមែនរដ្ឋាភិបាលមានមូលដ្ឋាន នៅទីក្រុង Zurich ប្រទេសស្វីស គឺលោកស្រី Birgit Geueke បាននិយាយថា ប្រហែល ១០០ប្រភេទនៃសារធាតុគីមីទាំងនេះ ត្រូវបានចាត់ទុកថា ជា «ក្ដីបារម្ភខ្ពស់» ចំពោះសុខភាពមនុស្ស។

សារធាតុមួយចំនួន ត្រូវបានសិក្សាយ៉ាងល្អ ហើយត្រូវបានគេរកឃើញរួចហើយ នៅក្នុងរាងកាយមនុស្ស ដូចជាសារធាតុ PFAS និងប៊ីសហ្វេណុល A ជាដើម។

ប៉ុន្តែលោកស្រីវេជ្ជបណ្ឌិត Geueke បានប្រាប់ទីភ្នាក់ងារព័ត៌មានបារាំង AFP ថា គេដឹងតិចតួចណាស់អំពីផលប៉ះពាល់ដល់សុខភាពរបស់សារធាតុដទៃទៀត ដោយអំពាវនាវឲ្យមានការស្រាវជ្រាវបន្ថែមទៀត អំពីថា តើសារធាតុគីមីដែលប្រើក្នុងការវេចខ្ចប់ ត្រូវបានចូលទៅក្នុងអាហារដែរ ឬយ៉ាងណា។

សារធាតុ PFAS ដែលត្រូវបានគេស្គាល់ថា ជាសារធាតុគីមីមិនរលាយ ត្រូវបានគេរកឃើញនៅក្នុងផ្នែកជាច្រើននៃរាងកាយមនុស្ស ក្នុងប៉ុន្មានឆ្នាំថ្មីៗនេះ និងបានផ្សារភ្ជាប់ទៅនឹងបញ្ហាសុខភាពជាច្រើន។ ចំណែកសារធាតុប៊ីសហ្វេណុល A (Bisphenol A) ជាសារធាតុគីមីរំខានដល់អរម៉ូនដែលត្រូវប្រើសម្រាប់ផលិតផ្លាស្ទិច ត្រូវបានហាមឃាត់រួចហើយមិនឲ្យមាននៅក្នុងដបទឹកដោះគោកូនក្មេង ក្នុងប្រទេសជាច្រើន៕