ទីភ្នាក់ងារសារព័ត៌មាន TASS បានដកស្រង់សម្តីរបស់លោក Alexei Mozhin នាយករបស់រុស្ស៊ីប្រចាំនៅមូលនិធិរូបិយវត្ថុអន្តរជាតិ (IMF) ដែលបាននិយាយនៅថ្ងៃពុធនេះថា IMF បានពន្យារពេលបេសកកម្មពិគ្រោះយោបល់ដែលបានគ្រោងទុកជាមួយរុស្ស៊ីដោយគ្មានកំណត់ ដោយសារតែបញ្ហាបច្ចេកទេស។

លោក Mozhin បានប្រាប់ថា៖ «ការគ្រប់គ្រងរបស់មូលនិធិនេះ បានជូនដំណឹងដល់ភាគីរុស្ស៊ី និងក្រុមប្រឹក្សាភិបាលថា ការងាររបស់បេសកកម្ម នឹងត្រូវបានពន្យារពេលដោយគ្មានកំណត់។ ការមិនបានត្រៀមខ្លួនខាងបច្ចេកទេសរបស់បេសកកម្ម ដើម្បីធ្វើការពិគ្រោះយោបល់ ត្រូវបានលើកឡើងថា ជាហេតុផលសម្រាប់ការពន្យារពេលបេសកកម្មនេះ»។

សម្រាប់សំណើសុំការអត្ថាធិប្បាយ IMF ពុំបានឆ្លើយតបភ្លាមៗនោះឡើយ។ ប្រទេសអ៊ុយក្រែន និងសម្ព័ន្ធមិត្តលោកខាងលិច បានជំទាស់នឹងបេសកកម្មទៅកាន់ប្រទេសរុស្ស៊ី ដោយលើកហេតុផលថា ស្ថាប័ននេះនឹងបង្ហាញពីការមានប្រក្រតីភាពឡើងវិញនូវទំនាក់ទំនងជាមួយរុស្ស៊ី ទោះបីជាមានការលុកលុយ និងការកាន់កាប់ដែនដីដ៏ច្រើនសន្ធឹកសន្ធាប់របស់ប្រទេសអ៊ុយក្រែនក៏ដោយ។

ការសម្រេចរបស់ IMF ត្រូវបានបង្ហាញកាលពីថ្ងៃចន្ទ (ទី១៦ ខែកញ្ញា) ជាថ្ងៃដែលបេសកកម្ម មានបំណងចាប់ផ្តើមការពិគ្រោះយោបល់តាមអ៊ីនធឺណិត។ ហើយបន្ទាប់មក មានគណៈប្រតិភូ IMF ធ្វើដំណើរទៅកាន់ទីក្រុងមូស្គូ ដើម្បីជួបជាមួយមន្ត្រីរុស្ស៊ី។ ការសម្រេចនេះ នឹងមានន័យថា IMF ក្លាយជាស្ថាប័នហិរញ្ញវត្ថុអន្តរជាតិដ៏សំខាន់ដំបូងគេដែលបញ្ជូនបេសកកម្មផ្លូវការរបស់ខ្លួនទៅរុស្ស៊ី ចាប់តាំងពីមានការលុកលុយលើអ៊ុយក្រែន នៅខែកុម្ភៈ ឆ្នាំ២០២២៕