ក្រសួងការបរទេសចិន បានឲ្យដឹងថា អ្នកវាយប្រហារដោយកាំបិតម្នាក់ នៅថ្ងៃពុធ (ទី១៨ ខែកញ្ញា) នេះ បានចាក់សិស្សសាលាជប៉ុនម្នាក់ នៅភាគខាងត្បូងប្រទេសចិន ដោយនេះជាការវាយប្រហារលើកទី២ ដែលពាក់ព័ន្ធនឹងកន្លែងអប់រំរបស់ជប៉ុននៅក្នុងប្រទេស ក្នុងរយៈពេលប៉ុន្មានខែថ្មីៗនេះ។

អ្នកនាំពាក្យក្រសួងការបរទេសចិន លោក Lin Jian បាននិយាយថា៖ «សិស្សអាយុ ១០ឆ្នាំម្នាក់នៃសាលាជប៉ុន នៅទីក្រុង Shenzhen ត្រូវបានចាក់ដោយបុរសម្នាក់ នៅចម្ងាយប្រហែល ២០០ម៉ែត្រពីទ្វារចូលសាលា»។

លោកបន្តថា សិស្សរូបនោះត្រូវបានបញ្ជូនទៅមន្ទីរពេទ្យភ្លាមៗ ហើយជនដៃដល់ត្រូវបានចាប់ខ្លួន នៅនឹងកន្លែង។ របាយការណ៍របស់នគរបាលពីតំបន់មួយ ក្នុងទីក្រុង Shenzhen ដែលមានសាលាជប៉ុន បានឲ្យដឹងថា ការវាយប្រហារលើកុមារម្នាក់ បានកើតឡើងនៅម៉ោងប្រហែល ៨ព្រឹក (ម៉ោងក្នុងស្រុក)។ ជនសង្ស័យដែលជាអ្នកវាយប្រហារមានឈ្មោះថា Zhong វ័យ ៤៤ឆ្នាំ ប៉ុន្តែរបាយការណ៍នោះមិនបានផ្តល់ហេតុផលអ្វីជាក់លាក់ទេ។

ទាំងអ្នកនាំពាក្យក្រសួងការបរទេស និងរបាយការណ៍នគរបាលមិនបានបញ្ជាក់ពីសញ្ជាតិរបស់ជនរងគ្រោះឡើយ។ លោក Lin បាននិយាយថា៖ «ករណីនេះកំពុងស្ថិតក្រោមការស៊ើបអង្កេតនៅឡើយ។ ប្រទេសចិននឹងបន្តចាត់វិធានការប្រកបដោយប្រសិទ្ធភាព ដើម្បីការពារសុវត្ថិភាពជនបរទេសទាំងអស់ នៅក្នុងប្រទេស»៕