វិមានក្រឹមឡាំង បានព្រមាននៅថ្ងៃពុធនេះថា ការវាយប្រហារលើក្រុមហេសប៊ូឡាលីបង់ និងក្រុមផ្សេងទៀត ដោយប្រើប្រាស់ការបំផ្ទុះឧបករណ៍ចាប់សញ្ញាអគ្គិសនី(Pager) អាចនឹងបង្កឲ្យមានជម្លោះធំជាងនេះនៅក្នុងតំបន់ ហើយពួកគេអំពាវនាវឲ្យកំណត់អត្តសញ្ញាណជនល្មើស នៅក្នុងការស៊ើបអង្កេត ។

ក្រុមហេសប៊ូឡា បានប្ដេជ្ញាសងសឹកអ៊ីស្រាអែល បន្ទាប់ពីការចោទប្រកាន់ថា អ៊ីស្រាអែលបានបំផ្ទុះឧបករណ៍ Pager ក្នុងពេលដំណាលគ្នានៅទូទាំងប្រទេសលីបង់ កាលពីថ្ងៃអង្គារ ដោយបានសម្លាប់មនុស្ស ៩ នាក់ និងមនុស្សជាង ៤ពាន់នាក់ផ្សេងទៀត រងរបួសរួម ទាំងក្រុមអ្នកប្រយុទ្ធរបស់ពួកគេ និងបេសកជនអ៊ីរ៉ង់ប្រចាំនៅទីក្រុង Beirut ផងដែរ ។

ប្រភពសន្តិសុខលីបង់ បាននិយាយប្រាប់ទីភ្នាក់ងារព័ត៌មានរ៉យទ័រថា ទីភ្នាក់ងារចារកម្ម Mossad របស់អ៊ីស្រាអែល បានបញ្ចូលគ្រឿងផ្ទុះទៅក្នុងឧបករណ៍ Pager ដែលនាំចូលដោយក្រុមហេសប៊ូឡា រយៈពេលជាច្រើនខែ មុនពេលបំផ្ទុះនៅថ្ងៃអង្គារ ។

លោក Dmitry Peskov គឺជាអ្នកនាំពាក្យវិមានក្រឹមឡាំង និយាយថា អ្វីដែលបានកើតឡើង មិនថាជារឿងអ្វីនោះទេ វាច្បាស់ណាស់ថា នឹងនាំឲ្យកើនឡើងភាពតានតឹង ។

លោកថា តំបន់មជ្ឈិមបូព៌ា ស្ថិតនៅក្នុងស្ថានភាពផ្ទុះ ហើយច្បាស់ណាស់ថា ឧបទ្ទេវហេតុបែបនេះ មានសក្តានុពលបង្កឲ្យស្ថានភាពលែងអាចគ្រប់គ្រងបាន ៕