ស្ថាប័នគ្រប់គ្រងបាល់ទាត់ពិភពលោក FIFA និងអង្គការសុខភាពពិភពលោក (WHO) នៅថ្ងៃពុធ (ទី១៨ ខែកញ្ញា) នេះ បានចាប់ផ្តើមគំនិតផ្តួចផ្តើមការយល់ដឹង អំពីការប៉ះទង្គិចក្បាលជាសកល ដែលត្រូវបានបង្កើតឡើងដោយអ្នកជំនាញសុខភាពខួរក្បាល។

ស្ថាប័នអន្តរជាតិទាំង២ បានឲ្យដឹងនៅក្នុងសេចក្តីថ្លែងការណ៍រួមថា គ្រោងការឈ្មោះ «Suspect and Protect: No Match is Worth the Risk» (សង្ស័យ និងការពារ៖ គ្មានការប្រកួតណានាំឲ្យមានហានិភ័យដល់សុខភាពនោះទេ) មានគោលបំណងបង្ហាញពីហានិភ័យនៃការប៉ះទង្គិចក្បាល និងផ្តល់ប្រភពធនធានលើប្រធានបទនេះ។

ប្រធាន FIFA លោក Gianni Infantino បាននិយាយថា៖ «តាមរយៈការដឹងពីការព្រមាននៃការប៉ះទង្គិច ក្បាល ដោយយល់ដឹងពីហានិភ័យ និងដោយទទួលការព្យាបាលការប៉ះទង្គិចក្បាលឲ្យបានត្រឹមត្រូវ អ្នកអាចយកសុវត្ថិភាពកីឡាករមុនអ្វីទាំងអស់»។

ក្រុមប្រឹក្សាភិបាលសមាគមកីឡាបាល់ទាត់អន្តរជាតិ (IFAB) បានអនុម័តច្បាប់ដាក់កីឡាករបម្រុងជំនួសកីឡាករសង្ស័យរបួសក្បាលអចិន្ត្រៃយ៍ នៅក្នុងខែមីនា បន្ទាប់ពីមានការសាកល្បង ដោយច្បាប់នេះត្រូវបានអនុវត្តនៅក្នុងការប្រកួតរបស់កម្មវិធី Copa America ឆ្នាំនេះ។

អគ្គនាយក WHO លោក Tedros Adhanom Ghebreyesus បាននិយាយថា ការប៉ះទង្គិចក្បាលត្រូវការការយល់ដឹងឲ្យកាន់តែខ្ពស់ នៅគ្រប់កម្រិតនៃការប្រកួតទាំងអស់។ លោកបានបន្ថែមថា៖ «WHO មានមោទនភាព ក្នុងការសហការជាមួយ FIFA ដើម្បីលើកកម្ពស់វិធីការពារខួរក្បាលរបស់កីឡាករបាល់ទាត់»៕