រដ្ឋមន្រ្តីការបរទេសអាមេរិក ជួបសមភាគីអេហ្ស៊ីបនៅទីក្រុងគែ ដើម្បីពិភាក្សាលើបញ្ហាសង្រ្គាមហ្កាហ្សា

រដ្ឋមន្រ្តីការបរទេសសហរដ្ឋអាមេរិកលោក Antony Blinken បានជួបជាមួយរដ្ឋមន្រ្តីការបរទេសអេហ្ស៊ីបលោក Badr Abdelatty នៅទីក្រុងគែ នាថ្ងៃពុធនេះ ។

ដំណើរទស្សនកិច្ចរបស់លោក Blinken បានកើតមានឡើង ស្របពេលដែលតំបន់នៅតែស្ថិតក្នុងគ្រោះអាសន្ន ដោយសារហានិភ័យនៃសង្រ្គាមហ្កាហ្សាកាន់តែរីកធំ ជាពិសេសក្រោយពេលក្រុមជីវពលហេសប៊ូឡា សន្យាសងសឹកអ៊ីស្រាអែល ដោយចោទប្រកាន់ពួកគេថា បានបំផ្ទុះឧបករណ៍ចាប់សញ្ញាអគ្គិសនី(Pager)នៅទូទាំងប្រទេសលីបង់កាលពីថ្ងៃអង្គារ ។

ក្រុមហេសប៊ូឡានិយាយថា អ៊ីស្រាអែលបានបំផ្ទុះឧបករណ៍ Pager ក្នុងពេលដំណាលគ្នានៅទូទាំងប្រទេសលីបង់ កាលពីថ្ងៃអង្គារ ដោយបានសម្លាប់មនុស្ស ៩ នាក់ និងមនុស្សជាង ៤ពាន់នាក់ផ្សេងទៀត រងរបួសរួម ទាំងក្រុមអ្នកប្រយុទ្ធរបស់ពួកគេ និងបេសកជនអ៊ីរ៉ង់ប្រចាំនៅទីក្រុង Beirut ផងដែរ ។

នៅថ្ងៃពុធនេះដែរ លោក Blinken បានជួបជាមួយប្រធានាធិបតីអេហ្ស៊ីបលោក Abdel Fattah al-Sisi ដើម្បីពន្លឿនកិច្ចខិតខំសម្រេចបានបទឈប់បាញ់នៅតំបន់ហ្កាហ្សា ក៏ដូចជាពង្រឹងទំនាក់ទំនងទ្វេភាគីជាមួយទីក្រុងគែ ។

សូមបញ្ជាក់ថា លោក Blinken បានធ្វើដំណើរទៅដល់ទីក្រុងគែ នៅព្រឹកថ្ងៃពុធនេះ ៕