រដ្ឋមន្ត្រីការពារជាតិរូម៉ានី លោក Angel Tilvar នៅថ្ងៃពុធ (ទី១៨ ខែកញ្ញា) នេះ បាននិយាយថា អង្គការណាតូ (NATO) ត្រូវតែអនុម័តការឆ្លើយតប «ដែលត្រូវគ្នាដ៏រឹងមាំមួយ» ចំពោះឧប្បត្តិហេតុដែលមីស៊ីល ឬយានដ្រូនរបស់រុស្ស៊ីបាញ់សំដៅទៅអ៊ុយក្រែន បានចូលទៅក្នុងដែនអាកាសរបស់សម្ព័ន្ធមិត្ត។

បណ្ដារដ្ឋនៅតាមព្រំដែនប៉ែកខាងកើតរបស់អង្គការណាតូ ដែលរដ្ឋមន្ត្រីការពារជាតិ បានជួបប្រជុំគ្នា នៅទីក្រុង Bucharest នាថ្ងៃពុធនេះ បានលើកឡើងម្តងហើយម្តងទៀតថា សកម្មភាពរបស់រុស្ស៊ី នៅក្នុងតំបន់សមុទ្រខ្មៅ និងហួសបពីតំបន់នេះទៀតនោះ គឺជាប្រភពនៃការព្រួយបារម្ភដ៏ខ្លាំងក្លា។

កាលពីដើមខែនេះ រដ្ឋជាសមាជិករបស់អង្គការណាតូ គឺរូម៉ានី និងឡាតវី បានឃើញនូវយានដ្រូនរបស់រុស្ស៊ីធ្លាក់ចូលដែនដីរបស់ខ្លួន បន្ទាប់ពីបានរំលោភលើដែនអាកាសរបស់ពួកគេ ដែលជំរុញឲ្យមានការអំពាវនាវជាផ្លូវការ ដើម្បីចាត់វិធានការរួមគ្នា ប្រឆាំងនឹងការលុកលុយតាមអាកាសរបស់រុស្ស៊ី។

គួរបញ្ជាក់ថា កាលពីសប្តាហ៍មុន អ៊ុយក្រែនបានចោទប្រកាន់រុស្ស៊ីថា បានប្រើប្រាស់យន្តហោះទម្លាក់គ្រាប់បែកយុទ្ធសាស្ត្រ ដើម្បីបង្កវិនាសកម្មដល់នាវាគ្រាប់ធញ្ញជាតិស៊ីវិល នៅក្នុងការវាយប្រហារដោយមីស៊ីលនៅក្នុងដែនទឹកសមុទ្រខ្មៅ ក្បែរប្រទេសរ៉ូម៉ានី ដែលហេតុការណ៍នោះកាន់តែបង្កើនភាពតានតឹង រវាងទីក្រុងមូស្គូ និងសម្ព័ន្ធមិត្តយោធាមួយនេះ៕