ប្រធានាធិបតីអ៊ុយក្រែន លោក វ្ល៉ូឌីមី ហ្សេឡិនស្គី (Volodymyr Zelenskiy) បាននិយាយកាលពីថ្ងៃពុធ (១៨ កញ្ញា) ថា «ផែនការជ័យជំនះ» របស់លោកដែលមានបំណងនាំមកនូវសន្តិភាពដល់អ៊ុយក្រែន ខណៈពេលដែលរក្សាប្រទេសឱ្យរឹងមាំ និងជៀសវាង «ជម្លោះជាប់គាំង» ទាំងអស់ឥឡូវនេះបានបញ្ចប់រួចរាល់ហើយ បន្ទាប់ពីការពិគ្រោះយោបល់ជាច្រើន។

លោក Zelenskiy បានសន្យាកាលពីខែមុនថានឹងបង្ហាញផែនការសន្តិភាពរបស់ខ្លួនទៅកាន់ប្រធានាធិបតីអាមេរិក លោក Joe Biden ដែលអាចនឹងនៅសប្តាហ៍ក្រោយនេះ នៅពេលលោកចូលរួមសម័យប្រជុំក្រុមប្រឹក្សាសន្តិសុខ និងមហាសន្និបាតអង្គការសហប្រជាជាតិ។

ខណៈពេលផ្តល់ព័ត៌មានថ្មីៗប្រចាំថ្ងៃអំពីការរៀបចំផែនការនេះ លោក Zelenskiy បានផ្តល់តម្រុយមួយចំនួននៃខ្លឹមសារ ដោយបង្ហើបតែថា ផែនការសន្តិភាពនោះមានគោលបំណងបង្កើតលក្ខខណ្ឌដែលអាចទទួលយកបានចំពោះអ៊ុយក្រែន ដែលឥឡូវនេះជាប់គាំងក្នុងជម្លោះជាមួយរុស្ស៊ី អស់រយៈពេលជាង ២ឆ្នាំកន្លះ។

លោក Zelenskiy បាននិយាយនៅក្នុងសុន្ទរកថាវីដេអូពេលយប់របស់ខ្លួនថា «ថ្ងៃនេះ ផែនការជ័យជំនះរបស់យើងត្រូវបានរៀបចំយ៉ាងពេញលេញ។ ចំណុចទូទៅ ចំណុចផ្តោតសំខាន់ និងការបន្ថែមលម្អិតចាំបាច់ទាំងអស់នៃផែនការត្រូវបានកំណត់រួចរាល់។ អ្វីដែលសំខាន់បំផុតគឺការប្តេជ្ញាចិត្តក្នុងការអនុវត្ត»។

ផែនការមួយពីមុន ដែលអ៊ុយក្រែនធ្លាប់បានបង្ហាញនៅចុងឆ្នាំ២០២២ ជាចំណុចស្នូលនៃ «កិច្ចប្រជុំកំពូលសន្តិភាព» ដែលស្វីសធ្វើជាម្ចាស់ផ្ទះក្នុងខែមិថុនា ជាមួយនឹងអ្នកចូលរួមសន្យាថានឹងរៀបចំកិច្ចប្រជុំកំពូលលើកទីពីរនៅចុងឆ្នាំនេះ។ រុស្ស៊ី មិនត្រូវបានអញ្ជើញឱ្យចូលរួមក្នុងកិច្ចប្រជុំកំពូលខែមិថុនាទេ ហើយបានចាត់ទុកថាជារឿងគ្មានន័យ ទោះបីជាអ៊ុយក្រែន និងសម្ព័ន្ធមិត្តនិយាយថាទីក្រុងមូស្គូ អាចចូលរួមក្នុងជំនួបកំពូលបន្ទាប់ក៏ដោយ៕