រដ្ឋាភិបាលរបស់ប្រទេសហៃទី កាលពីថ្ងៃពុធ (១៨ កញ្ញា) បានបង្កើតក្រុមប្រឹក្សាបោះឆ្នោតបណ្តោះអាសន្នមួយ ដែលជាជំហានជាក់ស្តែងបំផុតឆ្ពោះទៅរកការរស់ឡើងវិញនូវដំណើរការបោះឆ្នោតក្នុងរយៈពេលជាច្រើនឆ្នាំ បន្ទាប់ពីភាពចលាចលនយោបាយ និងអំពើហិង្សាបានរារាំងការប៉ុនប៉ងពីមុន។

ប្រទេសសមុទ្រការ៉ាអ៊ីបមួយនេះគ្រោងនឹងរៀបចំការបោះឆ្នោតនៅឆ្នាំ២០២៦ មួយទសវត្សរ៍បន្ទាប់ពីការបោះឆ្នោតត្រូវបានធ្វើឡើងចុងក្រោយក្នុងឆ្នាំ២០១៦។

នៅក្រោមកាលៈទេសៈធម្មតា ការបោះឆ្នោតនឹងត្រូវធ្វើឡើងរៀងរាល់ ៥ឆ្នាំម្តង ប៉ុន្តែស្ថានការណ៍នយោបាយដ៏រង្គោះរង្គើនៅហៃទី កាន់តែធ្ងន់ធ្ងរឡើងដោយការខ្វះអំណាចដែលបណ្តាលមកពីការធ្វើឃាតលោកប្រធានាធិបតី ហ្សូវ៉េណេ ម៉យអ៊ីស (Jovenel Moise) ក្នុងឆ្នាំ២០២១ ហើយប្រទេសនេះពុំមានប្រធានាធិបតីចាប់តាំងពីពេលនោះមក។

ក្រោយមក ក្រុមជនអន្ធពាលប្រដាប់អាវុធក៏បានពង្រីកការគ្រប់គ្រងរបស់ពួកគេលើប្រហែល ៨០ភាគរយនៃរដ្ឋធានីព័រអូប្រាំង និងផ្នែកផ្សេងទៀតភាគច្រើននៃប្រទេស។ ការិយាល័យនាយករដ្ឋមន្ត្រីបាននិយាយថា ក្រុមប្រឹក្សាថ្មីដែលបានបង្កើតកាលពីថ្ងៃពុធនេះមានអ្នកតំណាងចំនួន ៧អាសនៈរួចហើយ ដែលតំណាងឱ្យក្រុមសាសនា អ្នកសារព័ត៌មាន កសិករ និងសហជីព។

មន្រ្តីនិយាយលើបណ្ដាញសង្គម X ថា៖ អាសនៈចំនួន ២ផ្សេងទៀត ដែលមួយសម្រាប់អង្គការសិទ្ធិមនុស្ស និងមួយទៀតសម្រាប់អង្គការសិទ្ធិស្ត្រី នៅតែខ្វះគណៈប្រតិភូនៅឡើយ។ ក្រុមប្រឹក្សាថ្មីនេះនឹងទទួលភារកិច្ចក្នុងការរៀបចំក្របខ័ណ្ឌច្បាប់ដើម្បីរៀបចំការបោះឆ្នោត និងបន្ទាប់មករៀបចំផែនការបោះឆ្នោត រួមទាំងការអនុវត្ត៕