ប្រមុខអាជ្ញាធរការពារជាតិរបស់កោះតៃវ៉ាន់ បាននិយាយថា ក្រុមសន្តិសុខជាតិរបស់កោះ កំពុង «យកចិត្តទុកដាក់យ៉ាងខ្លាំង» ចំពោះហេតុកាណ៍បំផ្ទុះឧបករណ៍ទាក់ទងរាប់ពាន់គ្រឿង សំដៅទៅលើក្រុមហេសបូឡា ក្នុងប្រទេសលីបង់។

ក្រុមហ៊ុន ហ្គូល អាប៉ូឡូ (Gold Apollo) ដែលមានមូលដ្ឋាននៅតៃវ៉ាន់ និយាយថា ខ្លួនមិនបានផលិតឧបករណ៍ដែលប្រើក្នុងការវាយប្រហារនោះទេ ហើយថាឧបករណ៍ទាំងនោះត្រូវបានផលិតដោយក្រុមហ៊ុនដែលមានមូលដ្ឋាននៅទីក្រុងប៊ុយដាប៉ែស ដែលមានអាជ្ញាប័ណ្ណប្រើប្រាស់ម៉ាកសញ្ញារបស់ខ្លួន។

ថ្លែងទៅកាន់អ្នកសារព័ត៌មានក្នុងទីក្រុងតៃប៉ិ ប្រមុខអាជ្ញាធរការពារជាតិតៃវ៉ាន់ លោក វែលលីងតុន ខូ (Wellington Koo) បាននិយាយកាលពីថ្ងៃពុធ នៅក្នុងការអត្ថាធិប្បាយដែលចេញផ្សាយថ្ងៃព្រហស្បតិ៍ (១៩ កញ្ញា) នេះថា រដ្ឋាភិបាលកំពុងឃ្លាំមើលការវិវឌ្ឍយ៉ាងដិតដល់។

ក្រុមហេសបូឡា ដែលគាំទ្រដោយអ៊ីរ៉ង់ បានប្តេជ្ញាសងសឹកអ៊ីស្រាអែល ខណៈអ៊ីស្រាអែលមិនបានអះអាងទទួលខុសត្រូវចំពោះការបំផ្ទុះពីរថ្ងៃដែលបានសម្លាប់មនុស្សរាប់សិបនាក់ និងរាប់ពាន់នាក់រងរបួសនេះឡើយ។ ភាគីទាំងពីរបានធ្វើសង្គ្រាមឆ្លងដែនចាប់តាំងពីជម្លោះតំបន់ហ្កាហ្សា បានផ្ទុះឡើងកាលពីខែតុលាឆ្នាំមុនមក។

អ៊ីស្រាអែល ក៏ដូចជាប្រទេសភាគច្រើនដែរ មិនមានទំនាក់ទំនងការទូតផ្លូវការជាមួយកោះតៃវ៉ាន់ ដែលត្រូវចិនអះអាងសិទ្ធិនេះទេ ប៉ុន្តែភាគីទាំងពីររក្សាស្ថានទូតតាមជាក់ស្ដែង និងមានទំនាក់ទំនងជិតស្និទ្ធ ប៉ុន្តែមិនផ្លូវការ៕