ស្ថានភាពសន្តិសុខនៅប្រទេសម៉ាលី នៅតែមិនច្បាស់លាស់ បន្ទាប់ពីក្រុមបះបោរ បានវាយប្រហារសាលាបណ្តុះបណ្តាលនគរបាល និងតំបន់យុទ្ធសាស្ត្រផ្សេងទៀត កាលពីថ្ងៃអង្គារ ដោយបានសម្លាប់អ្នកចូលរួមបណ្តុះបណ្តាល បំផ្លាញផ្នែកមួយនៃអាកាសយានដ្ឋាន និងដុតយន្តហោះប្រធានាធិបតី។

ប្រទេសម៉ាលី ពុំបានបញ្ជាក់ពីចំនួនអ្នកស្លាប់នោះទេ ប៉ុន្តែបាននិយាយតាមទូរទស្សន៍រដ្ឋថា មានអ្នកស្លាប់ «មួយចំនួន» ។

វីដេអូមួយ ដែលបានចេញផ្សាយតាមបណ្តាញអ៊ីនធឺណិត បានបង្ហាញពីបន្ទប់ដេក មានគ្រែជាង២០ ត្រូវបានឆេះ ហើយសាកសពឆេះរោលជាច្រើនអាចត្រូវបានមើលឃើញ ដែលមួយចំនួននៅក្រោមគ្រែ។

ជើងហោះហើរ បានបន្តឡើងវិញកាលពីថ្ងៃពុធ ទៅកាន់អាកាសយានដ្ឋានធំនៅទីក្រុង Bamako ជាកន្លែងដែលកើតមានអំពើហិង្សាជាច្រើនដែលត្រូវបានអះអាងដោយសម្ព័ន្ធ Al Qaeda។

ប្រជាជនក្នុងរដ្ឋធានី បានបន្តសកម្មភាពប្រចាំថ្ងៃរបស់ពួកគេឡើងវិញ រួមទាំងនៅតំបន់ជុំវិញសាលាបណ្តុះបណ្ទាលនគរបាល ផងដែរ។

ការវាយប្រហារមួយ បានកើតឡើងនៅក្នុងថ្ងៃខួបលើកទី៦៤ នៃការបង្កើតកងតម្រួតរបស់ប្រទេសម៉ាលី ហើយបានកើតមានឡើងប៉ុន្មានថ្ងៃ បន្ទាប់ពីមេដឹកនាំរបបយោធា លោក Assimi Goita បាននិយាយថា កងទ័ពរបស់លោកបានធ្វើឲ្យក្រុមភេរវករប្រដាប់អាវុធចុះខ្សោយ។