សារព័ត៌មានរ៉យទ័រ បានរាយការណ៍ថា ប្រធានាធិបតីកូរ៉េខាងត្បូង យូន សុក យ៉ូល (Yoon Suk Yeol) បានព្រមានកូរ៉េខាងជើង និងរុស្ស៊ីអំពីផលវិបាកជាច្រើន ប្រសិនបើសកម្មភាពរបស់ពួកគេ បង្កការគំរាមកំហែងណាមួយ ដល់ទីក្រុងសេអ៊ូល។

ទីភ្នាក់ងារនេះ បាននិយាយថា ការធ្វើអត្ថាធិប្បាយអំពីកិច្ចសហប្រតិបត្តិការរវាងទីក្រុងមូស្គូ និងក្រុង ព្យុងយ៉ាង និងការផ្គត់ផ្គង់អាវុធដ៏មានសក្តានុពលដល់អ៊ុយក្រែន លោក យូន បានព្រមានថា កូរ៉េខាងជើង និងរុស្ស៊ី នឹងប្រឈមមុខនឹងផលវិបាកធ្ងន់ធ្ងរ ប្រសិនបើពួកគេ គំរាមកំហែងដល់សន្តិសុខរបស់កូរ៉េខាង ត្បូង។

លោកបានប្រាប់សារព័ត៌មានរ៉យទ័រមុនដំណើរទស្សនកិច្ចទៅកាន់សាធារណរដ្ឋឆេក ជាកន្លែងដែលលោក បាននិយាយថា លោកគ្រោងនឹងពិភាក្សាអំពីកិច្ចសហប្រតិបត្តិការរបស់រុស្ស៊ីជាមួយកូរ៉េខាងជើង ក៏ដូចជាកម្មវិធីមីស៊ីលនុយក្លេអ៊ែររបស់ទីក្រុងព្យុងយ៉ាងថា៖«សកម្មភាពណាមួយដែលគំរាមកំហែងដល់សុវត្ថិភាព និងអាយុជីវិតរបស់ប្រជាជនយើង មិនអាចអត់ឱនបានឡើយ»។

ក្នុងអំឡុងដំណើរទស្សនកិច្ចរបស់ប្រធានាធិបតីរុស្ស៊ី លោក វ្ល៉ាឌីមៀ ពូទីន ទៅកាន់ប្រទេសកូរ៉េខាងជើងកាលពីថ្ងៃទី ១៩ ខែមិថុនា ប្រទេសទាំងពីរ បានចុះហត្ថលេខាលើសន្ធិសញ្ញាភាពជាដៃគូយុទ្ធសាស្ត្រ គ្រប់ជ្រុងជ្រោយដែលផ្តល់ជំនួយយោធាភ្លាមៗ ក្នុងករណីមានសង្រ្គាមការពារនោះ។ ប្រធានាធិបតីរុស្ស៊ី បាន ប្តេជ្ញាថា សន្ធិសញ្ញានេះ មិនគំរាមកំហែងដល់កូរ៉េខាងត្បូងទេ។ ជាងនេះទៅទៀត ទីក្រុងមូស្គូ បានបដិសេធម្តងហើយម្តងទៀតចំពោះការជួញដូរអាវុធជាមួយទីក្រុងព្យុងយ៉ាង។