រដ្ឋមន្ត្រីការពារជាតិអ៊ីស្រាអែល លោក លោក យ៉ូអាវ ហ្គាឡែនធ៍ (Yoav Gallant) បាននិយាយកាលពីថ្ងៃពុធថា អ៊ីស្រាអែលបានឈានចូល «ដំណាក់កាលថ្មី» នៅក្នុងជម្លោះរបស់ខ្លួនជាមួយក្រុមហេសបូឡា ( Hezbollah) នៅក្នុងប្រទេសលីបង់ បន្ទាប់ពីមានការផ្ទុះពីរថ្ងៃដែលកំណត់គោលដៅទៅលើឧបករណ៍ទាក់ទងនៅទូទាំងប្រទេសលីបង់។

ថ្លែងនៅឯមូលដ្ឋានទ័ពអាកាសយោធានៅភាគខាងជើងប្រទេសអ៊ីស្រាអែល លោក ហ្គាឡែនធ៍ បាននិយាយថា អ៊ីស្រាអែល កំពុង «ផ្លាស់ប្តូរទៅភាគខាងជើង ដោយការបែងចែកធនធាន ថាមពល និងកងកម្លាំង»។

លោក ហ្គាឡែនធ៍ បានថ្លែងថា៖«យើងកំពុងចាប់ផ្តើមដំណាក់កាលថ្មីមួយនៅក្នុងសង្រ្គាម ពេលនេះ តម្រូវឲ្យមានភាពក្លាហាន ការប្តេជ្ញាចិត្ត និងការតស៊ូ»។ លោកបានបន្ថែមថា គោលដៅគឺ «ដើម្បីបញ្ជូនអ្នកស្រុកនៃសហគមន៍ភាគខាងជើង ត្រឡប់ទៅផ្ទះសម្តែងវិញដោយសុវត្ថិភាព»។

សេចក្តីប្រកាសនេះ បានធ្វើឡើងមួយថ្ងៃ បន្ទាប់ពីគណៈរដ្ឋមន្ត្រីសន្តិសុខរបស់នាយករដ្ឋមន្ត្រី បេនចាមីន ណេតាន់យ៉ាហ៊ូ ( Benjamin Netanyahu) បានសម្រេចចិត្តពង្រីកគោលបំណងនៃជម្លោះ ដើម្នីធ្វើឲ្យប្រជាជនអ៊ីស្រាអែលដែលផ្លាស់ទីលំនៅត្រឡប់ទៅតំបន់ព្រំដែនដែលរងផលប៉ះពាល់ដោយការប្រយុទ្ធឆ្លងព្រំដែនជាមួយក្រុមហេសបូឡា។

លោក ហ្គាឡែនធ៍ បានសរសើរការរីកចម្រើនរបស់យោធា ប៉ុន្តែមិនបានធ្វើអត្ថាធិប្បាយលើតួនាទីរបស់អ៊ីស្រាអែល ក្នុងការវាយប្រហារនាពេលថ្មីៗនេះ នៅក្នុងប្រទេសលីបង់នោះទេ។ លោកបាននិយាយថា៖«កងកម្លាំងការពារអ៊ីស្រាអែល (IDF) កំពុងសម្រេចបាននូវលទ្ធផលដ៏ល្អ រួមជាមួយនឹងទីភ្នាក់ងារចារកម្ម Shin Bet, Mossad និងស្ថាប័នពាក់ព័ន្ធផ្សេងទៀតទាំងអស់»។