មហាសន្និបាតអង្គការសហប្រជាជាតិ (UNGA) បានអនុម័តសេចក្តីសម្រេចដែលមិនជាប់កាតព្វកិច្ចមួយកាលពីថ្ងៃពុធ ដោយទាមទារឲ្យបញ្ចប់ការកាន់កាប់របស់អ៊ីស្រាអែលលើទឹកដីប៉ាឡេស្ទីន ក្នុងរយៈពេល ១២ ខែខាងមុខ ដោយមានសំឡេងគាំទ្រដ៏លើសលប់។

សេចក្តីសម្រេចនេះ ត្រូវបានអនុម័តដោយមានសំឡេងគាំទ្រ ១២៤ សំឡេង ១៤សំឡេងជំទាស និង ៤៣សំឡេងអនុប្បវាទ ក្នុងអំឡុងពេលសម័យប្រជុំពិសេសគ្រាអាសន្នលើកទី ១០ របស់មហាសន្និបាតUNអំពី សកម្មភាពរបស់អ៊ីស្រាអែលនៅទីក្រុងហ្ស៊េរុយសាឡឹមខាងកើតនិងទឹកដីប៉ាឡេស្ទីនទាំងមូល ដែលត្រូវបានគ្រប់គ្រងដោយអ៊ីស្រាអែល។

សេចក្តីសម្រេចដែលទាមទារឲ្យអ៊ីស្រាអែលគោរពតាមកាតព្វកិច្ចផ្លូវច្បាប់ទាំងអស់របស់ខ្លួន នៅក្រោមច្បាប់អន្តរជាតិ រួមទាំងការផ្តល់យោបល់ដោយតុលាការយុត្តិធម៌អន្តរជាតិ ត្រូវបានដាក់ជូនដោយរដ្ឋប៉ាឡេស្ទីនកាលពីថ្ងៃអង្គារ និងត្រូវបានសហការឧបត្ថម្ភដោយប្រទេសជាង២០។

តាមរយៈសេចក្តីសម្រេចដែលបានអនុម័តថ្មីៗនេះ មហាសន្និបាតអង្គការសហប្រជាជាតិ (UNGA) «ទាមទារឲ្យអ៊ីស្រាអែលបញ្ចប់ ដោយពុំមានពន្យារពេលវត្តមានខុសច្បាប់ នៅក្នុងទឹកដីប៉ាឡេស្ទីនដែលខ្លួនបានគ្រប់គ្រង ហើយចាំបាច់មានការទទួលខុសត្រូវរបស់ខ្លួនចំពោះអន្តរជាតិ ហើយធ្វើវាឲ្យមិនលើសពី ១២ខែ ចាប់ពីថ្ងៃដែលអនុម័តសេចក្តីសម្រេចបច្ចុប្បន្ននេះ»។