នៅថ្ងៃព្រហស្បតិ៍នេះ ប្រជាពលរដ្ឋលីបង់នៅក្នុងទីក្រុង Beirut បានបង្ហាញការព្រួយបារម្ភកើនឡើងរបស់ពួកគេ ក្រោយឧបករណ៍ទាក់ទងជាច្រើនគ្រឿង បានផ្ទុះនៅក្នុងប្រទេសមួយនេះ ។

ឧបករណ៍ទាក់ទងដែលប្រើប្រាស់ដោយក្រុមប្រដាប់អាវុធហេសប៊ូឡា បានផ្ទុះកាលពីថ្ងៃពុធ នៅទូទាំងតំបន់ភាគខាងត្បូងលីបង់ ដែលថ្ងៃស្លាប់មនុស្សច្រើនបំផុតក្នុងប្រទេសមួយនេះ ចាប់តាំងពីការប្រយុទ្ធគ្នាឆ្លងកាត់ព្រំដែន បានផ្ទុះឡើងរវាងក្រុមជីវពលហេសប៊ូឡា និងកងកម្លាំងអ៊ីស្រាអែល អស់រយៈពេលជិត ១ឆ្នាំ ធ្វើឲ្យភាពតានតឹងកាន់តែឡើងកម្តៅខ្លាំង ក្រោយការផ្ទុះស្រដៀងគ្នារបស់ឧបករណ៍ទាក់ទាង Pagerកាលពីរយៈពេល ១ថ្ងៃមុន ។

លោក Mustafa Sibai គឺជាពលរដ្ឋមួយរូបរបស់លីបង់ បានរៀបរាប់ពីក្តីបារម្ភកើតមានក្នុងគ្រួសាររបស់លោក ដោយលោកនិយាយថា ក្រោយទទួលបានដំណឹងពីការផ្ទុះ គាត់បានទុកទូរស័ព្ទដៃរបស់លោកចោលលើទោចចក្រយានយន្ត ហើយនិងបានដើរចេញ ។

លោកបន្តថា ជាការពិតណាស់ថា ពួកយើងខ្លាច ទាំងកូនៗរបស់ខ្ញុំ កូនៗបងប្អូនបង្កើតរបស់ខ្ញុំ ហើយនិងពួកយើងទាំងអស់គ្នា ។ តើអ្នកណាអាចមានអារម្មណ៍ថាសុវត្ថិភាព ក្នុងស្ថានភាពបែបនេះនោះ? 

ដោយឡែក លោក Abou Imad Safa គឺជាពលរដ្ឋមួយរូបទៀតរបស់លីបង់ បានចែករំលែកក្តីបារម្ភតែមួយ ។ លោក Safa និយាយថា ខ្ញុំខ្លាចទូរស័ព្ទដៃ ខ្ញុំកាន់វា ប៉ុន្តែខ្ញុំខ្លាចវា ។

យោងតាមការអះអាងរបស់ក្រសួងសុខាភិបាលលីបង់ បានឲ្យដឹងថា ការផ្ទុះឧបករណ៍ទាក់ទងនេះ បានសម្លាប់មនុស្ស ២០នាក់ និងមនុស្សជាង ៤៥០នាក់ផ្សេងទៀត រងរបួសកាលពីថ្ងៃពុធ នៅតាមតំបន់ជាយក្រុង Beirut និងតំបន់ជ្រលងភ្នំ Bekaa Valley ខណៈដែលចំនួនមនុស្សស្លាប់ ពីការផ្ទុះឧបករណ៍ទាក់ទងកាលពីថ្ងៃអង្គារ បានកើនឡើងដល់ ១២នាក់ រួមទាំងកុមារ ២នាក់ផងដែរ ក្នុងនោះមនុស្សជិត ៣ពាន់នាក់ រងរបួស ៕