ការិយាល័យប្រធានាធិបតីកូរ៉េខាងត្បូង កាលពីថ្ងៃព្រហស្បតិ៍ បានជំរុញឲ្យសហគមន៍វេជ្ជសាស្ត្រ ចេញមក សន្ទនា ដើម្បីបញ្ចប់ការធ្វើកូដកម្មរយៈពេលមួយខែ ប៉ុន្តែបានរក្សាជំហររបស់ខ្លួនថា ផែនការរបស់រដ្ឋាភិ   បាលក្នុងការបង្កើនកូតាចូលរៀននៅសាលាពេទ្យសម្រាប់ឆ្នាំ ២០២៥ គឺមិនអាចចរចាបានឡើយ។ 

លោក Jang Sang-yoon លេខាធិការជាន់ខ្ពស់របស់ប្រធានាធិបតីទទួលបន្ទុកគោលនយោបាយសង្គមបានធ្វើការអត្ថាធិប្បាយក្នុងអំឡុងពេលធ្វើសន្និសីទសារព័ត៌មាន នៅការិយាល័យប្រធានាធិបតីដោយនិយាយថា រដ្ឋាភិបាលបើកចំហ ក្នុងការកែសម្រួលកូតាចូលរៀនសម្រាប់ឆ្នាំ ២០២៦ ប៉ុន្តែមិនមែនសម្រាប់ឆ្នាំក្រោយនោះទេ។

លោកបានថ្លែងថា៖«សហគមន៍វេជ្ជសាស្រ្ត មិនគួរបញ្ឈប់ការដោះស្រាយបញ្ហា ដោយបង្ហាញបុរេលក្ខខណ្ឌចំពោះសំណើដល់ស្ថាប័នពិគ្រោះយោបល់រួមទាំងការផ្លាស់ប្តូរជំហររបស់រដ្ឋាភិបាល» ដោយសង្កត់ធ្ងន់ថាក្រុមគ្រូពេទ្យមាន «កាតព្វកិច្ច»បម្រើសាធារណជន។

រដ្ឋាភិបាល និងគណបក្សកាន់អំណាចមុននេះ បានស្នើសហគមន៍វេជ្ជសាស្ត្រ ចូលរួមជាមួយស្ថាប័នពិគ្រោះយោបល់ ដើម្បីពិភាក្សាអំពីផែនការកំណែទម្រង់ផ្នែកវេជ្ជសាស្រ្តរបស់រដ្ឋាភិបាល ដែលផ្តោតលើការបង្កើនកូតាចូលរៀននៅសាលាពេទ្យដល់ប្រហែល ២.000 នាក់ ក្នុងមួយឆ្នាំសម្រាប់រយៈពេល ៥ឆ្នាំ ខាងមុខ។