សារព័ត៌មាន The Wall Street Journal បានរាយការណ៍ដោយដកស្រង់ប្រភពថា សហរដ្ឋអាមេរិក ព្រួយបារម្ភថា អ៊ីស្រាអែល អាចនឹងបើកប្រតិបត្តិការជើងគោក នៅក្នុងប្រទេសលីបង់ ប្រឆាំងនឹងចលនាហេសបូឡាស៊ីអ៊ីត ( Shiite Hezbollah) ស្របពេលមានភាពតានតឹងកាន់តែខ្លាំងឡើង នៅមជ្ឈិមបូព៌ា។

ការបោះពុម្ពផ្សាយរបស់សារព័ត៌មាននេះ បានកត់សម្គាល់ថា ប្រមុខមន្ទីរបញ្ចកោណលោក Lloyd Austin បានសម្តែងការព្រួយបារម្ភនៅឯកិច្ចប្រជុំថ្ងៃទី ១៦ ខែកញ្ញា ជាមួយមន្រ្តីជាន់ខ្ពស់ថា អ៊ីស្រាអែល «អាចចាប់ផ្តើមវាយលុកក្នុងពេលឆាប់ៗនេះ»។ មន្ត្រីជាន់ខ្ពស់អាមេរិកម្នាក់ បានដកស្រង់សម្តីលោក Austin ថា៖«ខ្ញុំមានការព្រួយបារម្ភយ៉ាងខ្លាំងអំពីការរីករាលដាលនេះមិនអាចគ្រប់គ្រងបាន។ ភាពភ័យខ្លាចនៅក្នុងទីក្រុងវ៉ាស៊ីនតោន បានកើនឡើង បន្ទាប់ពីការផ្ទុះជាបន្តបន្ទាប់ នៅក្នុងប្រទេសលីបង់។

សារព៏ត៌មាន The Wall Street Journal សង្កត់ធ្ងន់ថា អ៊ីស្រាអែល បានដាក់ពង្រាយកងកម្លាំងពិសេស និងទាហានឆ័ត្រយោងរាប់ពាន់នាក់ពីភាគខាងត្បូង ទៅភាគខាងជើងនៃប្រទេស។ ពីមុន កងទ័ពទាំងនេះ បានប្រយុទ្ធគ្នានៅតំបន់ហ្កាហ្សាស្ទ្រីបអស់រយៈពេលជាច្រើនខែ។