​

រដ្ឋមន្ត្រីការបរទេសអេហ្ស៊ីប លោក Badr Abdelatty បាននិយាយជាថ្មីកាលពីថ្ងៃពុធថា អេហ្ស៊ីប នឹងមិនទទួលយកការផ្លាស់ប្តូរណាមួយចំពោះវិធានការប្រតិបត្តិការនៅច្រកឆ្លងកាត់ទីក្រុង Rafah ដែលបានដាក់ នៅមុនពេលសង្គ្រាមអ៊ីស្រាអែល នៅតំបន់ហ្កាហ្សា ជាពិសេសវិធានការទាំងឡាយណាដែលធ្វើឲ្យប៉ះពាល់ដល់ភាគីប៉ាឡេស្ទីន។

និយាយនៅក្នុងសន្និសីទសារព័ត៌មាន រួមនៅក្នុងទីក្រុងគែរ ជាមួយរដ្ឋមន្ត្រីការបរទេសសហរដ្ឋអាមេរិក ដែលកំពុងធ្វើទស្សនកិច្ចលោក Antony Blinken លោកAbdelatty បានបញ្ជាក់ពីការបដិសេធរបស់ប្រទេសអេហ្ស៊ីបចំពោះវត្តមានយោធានៅតាមបណ្តោយនៃច្រកឆ្លងកាត់ទីក្រុងRafah ខាងភាគីប៉ាឡេស្ទីន និងនៅច្រករបៀង Philadelphi ។

អ្នកការទូតទាំងពីរ បានបញ្ជាក់លើភាពចាំបាច់នៃការទទួលបានបទឈប់បាញ់នៅតំបន់ហ្កាហ្សាស្ទ្រីបថា ជាមធ្យោបាយដ៏ល្អបំផុតដើម្បីធានាបានស្ថិរភាពក្នុងតំបន់ និងបាននិយាយថាបញ្ហាសំខាន់ៗដែលមិនទាន់បានដោះស្រាយ នៅតែទាក់ទងនឹងកិច្ចព្រមព្រៀងបទឈប់បាញ់។ អ្នកការទូតទាំងពីរ អះអាងថា ការដោះស្រាយបញ្ហាទាំងនេះ អាស្រ័យលើឆន្ទៈនយោបាយ។

ដំណើរទស្សនកិច្ចរបស់លោក Blinken ទៅកាន់ប្រទេសអេហ្ស៊ីប គឺជាលើកទី១០ របស់លោកទៅកាន់តំបន់មជ្ឈិមបូព៌ា ចាប់តាំងពីអ៊ីស្រាអែល បានចាប់ផ្តើមការវាយលុកទ្រង់ទ្រាយធំលើតំបន់ហ្កាហ្សានៅថ្ងៃទី៧ ខែតុលា ឆ្នាំ២០២៣។ 

ដំណើរទស្សនកិច្ចរបស់លោក ធ្វើឡើងក្នុងពេលមានការព្រួយបារម្ភអំពីជម្លោះក្នុងតំបន់កាន់តែទូលំទូលាយ ខណៈអ៊ីស្រាអែលបានគំរាមផ្លាស់ប្តូរការផ្តោតសំខាន់ផ្នែកយោធារបស់ខ្លួនពីតំបន់ហ្កាហ្សា ទៅប្រទេសលីបង់ បន្ទាប់ពីជម្លោះរយៈពេល១១ ខែ។