នៅថ្ងៃព្រហស្បតិ៍នេះ ប្រទេសជប៉ុន បានស្នើសុំឲ្យប្រទសចិនផ្តល់ការពន្យល់ដ៏លម្អិតឲ្យបានច្បាស់លាស់ និងចាត់វិធានការសុវត្ថិភាពខ្លាំងក្លា ក្រោយពេលក្មេងប្រុសម្នាក់ បានស្លាប់ បន្ទាប់ពីការវាយប្រហារដោយដេញចាក់នៅទីក្រុងភាគខាងត្បូង Shenzhen របស់ប្រទេសចិន ។

រដ្ឋមន្រ្តីការបរទេសជប៉ុនលោកស្រី Yoko Kamikawa និយាយប្រាប់ក្រុមអ្នកសារព័ត៌មាននៅទីក្រុងតូក្យូថា ក្រុមមន្រ្តីជប៉ុន បានស្នើសុំប្រទេសចិនឲ្យចាត់វិធានការតាមលទ្ធភាពទាំងអស់ ដើម្បីធានាដល់សុវត្ថិភាពជនជាតិរបស់ពួកគេ បន្ទាប់ពីមានការវាយប្រហារកាលពីថ្ងៃពុធលើក្មេងប្រុសជនជាតិជប៉ុនវ័យ ១០ឆ្នាំម្នាក់ ។

លោកស្រី Kamikawa និយាយថា ក្មេងប្រុសម្នាក់នេះ បានស្លាប់នៅព្រឹកថ្ងៃព្រហស្បតិ៍នេះ ។

ក្រុមអាជ្ញាធរចិន និយាយថា ក្មេងប្រុសដែលបានស្លាប់ គឺជាជនជាតិជប៉ុនកើតក្នុងគ្រួសារដែលមានឪពុកជាជនជាតិជប៉ុន និងម្តាយជាជនជាតិចិន ហើយត្រូវបានគេចាក់សម្លាប់នៅតាមផ្លូវទៅកាន់សាលារៀន កាលពីវេលាម៉ោងប្រហែល ៨ព្រឹក ម៉ោងក្នុងស្រុកថ្ងៃពុធ ដោយឃាតករវ័យ ៤៤ឆ្នាំម្នាក់មានគោត្តនាម Zhong ។

វាគឺជាការវាយប្រហារលើកទី ២នៅជិតសាលាអប់រំជប៉ុននៅក្នុងប្រទេសចិន នារយៈពេលប៉ុន្មានខែកន្លងមកនេះ ។

កាលពីខែមិថុនាកន្លងទៅ បុរសម្នាក់ បានវាយប្រហារថយន្តក្រុងមួយគ្រឿង ប្រើប្រាស់ដោយសាលាជប៉ុននៅទីក្រុងភាគខាងកើត Suzhou បណ្តាលឲ្យជនជាតិចិនម្នាក់ បាត់បង់ជីវិត ដោយសាររូបលោកព្យាយាមការពារស្រ្តីជាម្តាយជនជាតិជប៉ុន និងកូនរបស់នាងពីឃាតករម្នាក់នោះ ៕