ប្រទេសចិន នៅថ្ងៃព្រហស្បតិ៍ (ទី១៩ ខែកញ្ញា) នេះ បានឲ្យដឹងថា នាវាផ្ទុកយន្តហោះ Liaoning របស់ខ្លួន បានបំពេញបេសកកម្មហ្វឹកហាត់តាមទម្លាប់ នៅមហាសមុទ្រប៉ាស៊ីហ្វិកខាងលិច ហើយបានច្រានចោលការចោទប្រកាន់ពីទីក្រុងតូក្យូ ដែលថា នាវានេះ និងនាវាអមដំណើររបស់ខ្លួន បានចូលទៅក្នុងដែនទឹកជប៉ុន។

សម្រាប់ហេតុការណ៍ចុងក្រោយបង្អស់ នៅក្នុងជម្លោះដ៏យូរអង្វែង រវាងទីក្រុងប៉េកាំង និងទីក្រុងតូក្យូ ជុំវិញសកម្មភាពដែនសមុទ្រ ក្រសួងការពារជាតិរបស់ជប៉ុន កាលពីថ្ងៃពុធ (ទី១៨ ខែកញ្ញា) បាននិយាយថា នាវាផ្ទុកយន្តហោះ និងនាវាពិឃាតអមដំណើរ ២គ្រឿង បានធ្វើនាវាចរណ៍ រវាងកោះ Yonaguni ភាគខាងត្បូង និងកោះ Iriomote របស់ប្រទេសជប៉ុន នៅក្នុងដែនទឹកដែលជប៉ុនអាចអនុវត្តការគ្រប់គ្រងបាន។

នៅថ្ងៃព្រហស្បតិ៍នេះ ក្រសួងការពារជាតិរបស់ប្រទេសចិន បានឆ្លើយតប ដោយនិយាយថា នាវាទាំងនោះកំពុងធ្វើលំហាត់សម ស្របតាមច្បាប់អន្តរជាតិដែលពាក់ព័ន្ធទាំងអស់។ តែក្រសួងមិនបានផ្តល់ទីតាំងពិតប្រាកដរបស់កងនាវាទាំងនោះទេ។ ក្រសួងការពារជាតិបានលើកឡើងនៅក្នុងសេចក្តីថ្លែងការណ៍ថា៖ «ភាគីពាក់ព័ន្ធមិនចាំបាច់បកស្រាយឲ្យជ្រុលហួសហេតុពេកនោះទេ»។

អគ្គលេខាធិការរងនៃខុទ្ទកាល័យរបស់ប្រទេសជប៉ុន លោក Hiroshi Moriya កាលពីថ្ងៃពុធ បាននិយាយថា ទីក្រុងតូក្យូ បានបង្ហាញនូវកង្វល់ដ៏ធ្ងន់ធ្ងររបស់ខ្លួនទៅកាន់ទីក្រុងប៉េកាំង ដោយពណ៌នាហេតុការណ៍នេះថា «មិនអាចទទួលយកបានជាដាច់ខាត»៕