យោធារបស់ប្រទេសអេក្វាឌ័រ បានចេញល្បាតនៅតាមដងផ្លូវក្នុងទីក្រុងហ្គីតូ បន្ទាប់ពីរដ្ឋាភិបាល បានអនុវត្តការផ្តាច់ចរន្តអគ្គិសនីនៅពេលយប់ នៅទូទាំងប្រទេសតំបន់ភ្នំអង់មួយនេះ ក្នុងពេលមានគ្រោះរាំងស្ងួតធ្ងន់ធ្ងរ ដែលបណ្តាលឱ្យកម្រិតទឹកធ្លាក់ចុះ ធ្វើឲ្យប៉ះពាល់ដល់រោងចក្រវារីអគ្គិសនី។

ប្រជាជនមួយចំនួន បានសម្ដែងការព្រួយបារម្ភចំពោះការដាច់ចរន្តអគ្គិសនី។ នាង Rubi Doycela បាននិយាយថា នាងព្រួយបារម្ភអំពីសកម្មភាពឧក្រិដ្ឋកម្ម ហើយពលរដ្ឋម្នាក់ទៀត នាង Noemi Luspa បាននិយាយថា នាង ភ័យខ្លាចខ្លាំងនៅពេលយប់ ខណៈប្រទេសប្រទេសកំពុងប្រឈមមុខទៅនឹងការដាច់ចរន្តអគ្គិសនី។

រដ្ឋាភិបាលប្រទេសអេក្វាឌ័រ បានកំណត់ថា វិបត្តិថាមពល កើតមានដោយសារតែកង្វះការថែទាំនៃទំនប់ដែលមានស្រាប់ និងកិច្ចសន្យាមិនគ្រប់គ្រាន់ ដើម្បីធានាបានការផលិតថាមពលថ្មី គួបផ្សំជាមួយនឹងគ្រោះរាំងស្ងួតដ៏អាក្រក់បំផុតរបស់ប្រទេសក្នុងរយៈពេល៦១ ឆ្នាំ កន្លងទៅនេះ។

រដ្ឋាភិបាល បានប្រកាសថា នឹងមានការផ្អាកសេវានៅទូទាំងប្រទេសនៅចន្លោះម៉ោង ១០ យប់ រហូតដល់ម៉ោង ៦ ព្រឹក ម៉ោងក្នុងស្រុក ហើយការផ្តាច់ចរន្តអគ្គិសនីបន្ថែមទៀត នឹងធ្វើឡើងពីថ្ងៃច័ន្ទ ទី២៣ ដល់ថ្ងៃព្រហស្បតិ៍ ទី ២៦ ខែកញ្ញា។ គេនៅមិនទាន់ដឹងច្បាស់ថា ការដាច់ចរន្តអគ្គិសនីនឹងត្រូវអនុវត្តរយៈពេលប៉ុន្មានសប្តាហ៍នោះទេ។

យោងតាមអាជ្ញាធរបានឲ្យដឹងថា ប្រទេសអេក្វាឌ័រ ត្រូវការថាមពល ១.០០០ មេហ្គាវ៉ាត់បន្ថែមទៀត ឬមួយជីហ្គាវ៉ាត់ ដើម្បីផ្គត់ផ្គង់តម្រូវការរបស់ប្រទេស។