នគរបាលប្រទេសព័រទុយហ្គាល់ បានចាប់ខ្លួនអ្នកលួចដុតដែលសង្ស័យចំនួន១៤នាក់ នៅសប្តាហ៍នេះ ជាអ្នកដែលប្រហែលជាបានបង្កឱ្យមានចំហេះព្រៃដ៏មហន្តរាយនៅទូទាំងប្រទេស ដែលបានរួមចំណែកដល់ហានិភ័យនៃចំហេះព្រៃ បណ្តាលមកពីបម្រែបម្រួលអាកាសធាតុ។

ចំហេះព្រៃ បានឆក់យកជីវិតមនុស្សយ៉ាងហោច៧នាក់ និងបំផ្លាញលំនៅឋាន រោងចក្រ និងព្រៃឈើរាប់ម៉ឺនហិកតា។

នាយករដ្ឋមន្ត្រី លោក Luis Montenegro បានសន្យាថា «ចាត់វិធានការបង្ក្រាបតឹងរ៉ឹង» ប្រឆាំងឧក្រិដ្ឋកម្មបែបនេះ ដែលត្រូវបានប្រព្រឹត្តក្នុងនាមផលប្រយោជន៍ពិសេស។

សាស្ត្រាចារ្យសាកលវិទ្យាល័យ Lusofona ឯកទេសផ្នែកការពារស៊ីវិល បានប្រាប់សារព័ត៌មានរ៉យទ័រ ថា មានសញ្ញាខ្លាំងៗនៃសកម្មភាពឧក្រិដ្ឋកម្ម ដោយសារតែចំហេះព្រៃជាច្រើនកន្លែង បានចាប់ផ្តើមនៅពេលយប់។

អ្នកស្រាវជ្រាវ និងជាអ្នកជំនាញខាងឧក្រិដ្ឋកម្ម លោក Andre Inacio បាននិយាយថា ចំហេះព្រៃទំនងជាមកពីស្ថានភាពអាកាសធាតុកាន់តែមិនអំណោយផលខ្លាំង ដែលយើងមានព្រៃស្ងួត និងខ្យល់បក់ខ្លាំង ទោះបីជាការកើតឡើងដំបូង អាចជារឿងចៃដន្យក៏ដោយ។

លោកបាននិយាយថា ចំហេះព្រៃថ្មីៗ ដែលបានចាប់ផ្តើមនៅពេលព្រឹកព្រលឹម មិនបានចាប់ផ្តើមដោយខ្លួនឯងទេ វាជាមូលហេតុនៃការដុតបំផ្លាញដោយចេតនា។