​អាមេរិក៖ ដោយ​មិន​លើកឡើង​ពី​បញ្ហា​ជាមួយ​ប្រទេស​បារាំង សម្ព័ន្ធ​ភាព​ត្រីភាគី និង​នាវាមុជទឹក​ដើរ​ដោយ​ថាមពល​នុយក្លេអ៊ែរ គឺជា​ចំណែក​មួយ​នៃ​ពេលវេលា​ដ៏​សំខាន់​បំផុត សម្រាប់​ឥទ្ធិពល​របស់​សហរដ្ឋ​អាមេរិក​នា​ពេល​អនាគត​នៅ​តំបន់​អាស៊ី គឺ​ត្រូវ​លើក​មក​និយាយ​នៅ​ទីក្រុង​វ៉ាស៊ីនតោន​នៅ​ថ្ងៃ​សុក្រ​នេះ​។​

​ប្រធានាធិបតី​អាមេរិក​លោក Joe Biden កំពុង​រៀបចំ​កិច្ចប្រជុំ​ទល់មុខ​គ្នា​លើកដំបូង​នៃ​កិច្ច​សន្ទនា​សន្តិសុខ​ចតុ​ភាគី ដែល​ត្រូវ​បាន​គេ​ស្គាល់​ច្បាស់​ថា​ “Quad" ដែល​ជា​វេទិកា​យុទ្ធសាស្ត្រ​ក្រៅផ្លូវការ​របស់​សហរ​ដ្ឋ​អាមេរិក អូស្ត្រាលី ជប៉ុន និង​ឥណ្ឌា ជា​ប្រទេស​ប្រជាធិបតេយ្យ​ទាំងអស់​ដែល​យក​ចិត្ត​ទុកដាក់​ខ្លាំង ​ប្រឆាំង​ការ​កើន​ឡើង​ឥទ្ធិពល​របស់​ចិន​នៅ​តំបន់​អាស៊ី​។​ ​សេត​វិមាន​បាន​និយាយ​ថា លោក Biden នឹង​ចូល​រួម​ពិភាក្សា​នៅ​ទីក្រុង​វ៉ាស៊ីនតោន​ជាមួយ​លោក នាយក​រដ្ឋមន្ត្រី​ជប៉ុន Yoshihide Suga, មេដឹកនាំ​ឥណ្ឌា​លោក Narendra Modi និង​នាយករដ្ឋមន្ត្រី​អូស្ត្រាលី​លោក Scott Morrison ស្ដីពី​ការលើកកម្ពស់​តំបន់​ឥណ្ឌូ​-​ប៉ាស៊ីហ្វិក​សេរី និង​បើក​ចំហ​។​

​កិច្ចប្រជុំ​នេះ​ធ្វើឡើង​ ស្របពេល​មានការ​ផ្លាស់ប្តូរ​ដ៏​ធំ​សម្រាប់​គោលនយោបាយ​អាមេរិក​ នៅ​តំបន់​អាស៊ី​។ ខណៈ​រដ្ឋបាលលោក Biden ព្យាយាម​ពង្រឹង​ភាពជា​ដៃគូ​ការទូត​របស់ខ្លួន​នៅក្នុង​តំបន់ ប្រទេស​ជប៉ុន​កំពុងមាន​ទស្សនៈ​កាន់តែខ្លាំង​ឡើងៗ អំពី​ការពង្រឹង​វិស័យ​យោធា​របស់​ចិន​។ ក្នុងពេល​ជាមួយគ្នានេះដែរ ​កិច្ចព្រមព្រៀង​ការពារជាតិ​របស់​អូស្ត្រាលី​​ជាមួយ​អាមេរិក និង​ចក្រភព​អង់គ្លេស បាន​ពង្រឹង​ការប្តេជ្ញាចិត្ត​របស់​ទីក្រុង​វ៉ាស៊ីនតោនចំពោះ​អាស៊ី ខណៈដែល​ធ្វើឱ្យ​ដៃគូ​អាស៊ីអាគ្នេយ៍​សំខាន់ៗ​មួយចំនួន​មិន​សប្បាយចិត្ត​៕

អត្ថបទ៖ សុខមាន