រដ្ឋមន្ត្រីការបរទេសរុស្ស៊ី លោក Sergei Lavrov ត្រូវបានគេដកស្រង់សម្តីដោយទីភ្នាក់ងារសារព័ត៌មានរុស្ស៊ី ដែលបាននិយាយថា ប្រទេសរុស្ស៊ី បានត្រៀមដើម្បីការពារផលប្រយោជន៍របស់ខ្លួននៅក្នុងតំបន់អាកទិក ទោះបីជាតាមរយៈមធ្យោបាយយោធាក៏ដោយ ខណៈសម្ព័ន្ធយោធាណាតូ បង្កើនសមយុទ្ធយោធានៅក្នុងតំបន់នេះ។

លោក Lavrov បាននិយាយនៅក្នុងបទសម្ភាសន៍មួយថា យើងសង្កេតមើលពីរបៀបដែលសម្ព័ន្ធយោធាណាតូ កំពុងបង្កើនសមយុទ្ធពាក់ព័ន្ធនឹងវិបត្តិដ៏ធំអាចកើតមាននៅក្នុងតំបន់អាក់ទិក។ ប្រទេសរបស់យើង បានត្រៀមយ៉ាងពេញលេញដើម្បីការពារផលប្រយោជន៍របស់ខ្លួនលើផ្នែកយោធា នយោបាយ និងសមរភូមិផ្នែកបច្ចេកទេសយោធា។

ការអត្ថាធិប្បាយរបស់លោក Lavrov ធ្វើឡើងក្នុងពេលមានភាពតានតឹងកាន់តែខ្លាំងឡើងនៅក្នុងតំបន់អាក់ទិក ដែលសម្ព័ន្ធយោធាណាតូ បាននិងកំពុងបង្កើនវត្តមានរបស់ខ្លួន។

កាលពីខែកក្កដា ក្រសួងការពារជាតិសហរដ្ឋអាមេរិក បានចេញផ្សាយកំណែដែលបានធ្វើបច្ចុប្បន្នភាពនៃយុទ្ធសាស្ត្រតំបន់អាក់ទិករបស់ខ្លួន ដោយរៀបរាប់ពីផែនការសម្រាប់សមយុទ្ធយោធារួមគ្នាជាមួយសម្ព័ន្ធមិត្ត ដើម្បីបង្ហាញពីការត្រៀមខ្លួនប្រយុទ្ធ និងភាពចុះសម្រុងគ្នានៃប្រតិបត្តិការ។

យោងតាមយុទ្ធសាស្ត្ររបស់មន្ទីរបញ្ចកោណបានឲ្យដឹងថា សហរដ្ឋអាមេរិក និងសម្ព័ន្ធមិត្ត មានផែនការ បង្ហាញយន្តហោះចម្បាំងពហុមុខងារទំនើប ជាង២៥០គ្រឿង ដែលអាចត្រូវបានដាក់ពង្រាយសម្រាប់ប្រតិបត្តិការនៅតំបន់អាក់ទិក នៅទសវត្សរ៍ឆ្នាំ២០៣០។

កាលពីដើមខែនេះ លោក Nikolai Patrushev ជំនួយការប្រធានាធិបតីរុស្ស៊ី បាននិយាយថា សហរដ្ឋអាមេរិក និងសម្ព័ន្ធមិត្ត កំពុងបង្កើនសម្ពាធនៅជុំវិញព្រំដែនរបស់រុស្ស៊ី ដោយសាកល្បងសមត្ថភាពការពាររបស់ខ្លួនឥតឈប់ឈរ។ លោក Patrushev បានចោទប្រកាន់ភាគីអាមេរិកថា កំពុងបន្តប្រើប្រាស់ប្រយោជន៍យោធានៅតំបន់អាក់ទិក ដោយព្យាយាមរារាំងសកម្មភាពសេដ្ឋកិច្ចរបស់រុស្ស៊ី នៅ តំបន់ភាគខាងជើង។