សភាអ៊ឺរ៉ុប បានអនុម័តសេចក្តីសម្រេចមួយ ដោយអំពាវនាវឲ្យមានដីកាចាប់ខ្លួនអន្តរជាតិសម្រាប់ប្រធានាធិបតីវ៉េណេហ្ស៊ុយអេឡា នីកូឡាស ម៉ាឌូរ៉ូ (Nicolas Maduro) និងការទទួលស្គាល់មេដឹកនាំបក្សប្រឆាំង អេដម៉ាន់ដូ ហ្គុនហ្សាឡេស អ៊ូរ៉ូទៀ (Edmundo Gonzalez Urrutia) ជាប្រមុខរដ្ឋ។

សេចក្តីសម្រេចរបស់ស្ថាប័ននីតិប្បញ្ញត្តិ គឺជាការសម្រាប់ផ្តល់យោបល់ និងមិនមានកាតព្វកិច្ចតាមច្បាប់ ឡើយ។

សេចក្តីសម្រេចនេះ បាននិយាយថា សភា «អំពាវនាវឲ្យសហភាពអឺរ៉ុប និងរដ្ឋជាសមាជិករបស់ខ្លួន ស្នើសុំដីកាចាប់ខ្លួនអន្តរជាតិចំពោះលោក នីកូឡាស ម៉ាឌូរ៉ូ (Nicolas Maduro) ពីបទឧក្រិដ្ឋកម្មប្រឆាំងមនុស្សជាតិ» ។

សមាជិកសភា ក៏បានអំពាវនាវឲ្យដាក់ទណ្ឌកម្មឡើងវិញប្រឆាំងនឹងសមាជិកក្រុមប្រឹក្សាជាតិរៀបចំការបោះឆ្នោតរបស់ប្រទេស ជុំវិញអ្វីដែលពួកគេនិយាយថា ខ្វះតម្លាភាពក្នុងអំឡុងពេលរាប់សន្លឹកឆ្នោត។ ពួកគេក៏បានអំពាវនាវឲ្យមានការរឹតបន្តឹងបន្ថែមទៀតប្រឆាំងនឹងមន្ត្រីវ៉េណេហ្ស៊ុយអេឡា។

យោងតាមសេចក្តីសម្រេច សមាជិកសភា បានទទួលស្គាល់លោក អេដម៉ាន់ដូ ហ្គុនហ្សាឡេស អ៊ូរ៉ូទៀ ជាប្រធានាធិបតីស្របច្បាប់នៃប្រទេសវ៉េណេហ្ស៊ុយអេឡា ហើយបានជំរុញប្រទេសសមាជិកសហភាពអឺរ៉ុប ឲ្យធ្វើដូចគ្នា។ សហភាពអឺរ៉ុប និងរដ្ឋជាសមាជិកគួរតែ «ប្រឹងប្រែងឲ្យអស់ពីសមត្ថភាព» ដើម្បីធានាថា លោកអាចចូលកាន់តំណែង នៅថ្ងៃទី ១០ ខែមករា ឆ្នាំ ២០២៥។ សេចក្តីសម្រេច បានបញ្ជាក់ថាប្រសិនបើការផ្ទេរអំណាច មិនកើតឡើងទេ ការធ្វើទេសន្តរប្រវេសន៍កាន់តែច្រើនទៅកាន់ប្រទេសផ្សេងទៀតនៅក្នុងតំបន់ នឹងកើតឡើងជាក់ជាមិនខាន។