ផ្លូវ និងសង្កាត់នានា ក្នុងទីក្រុងសៀងហៃ ត្រូវបានលិចដោយទឹកជំនន់ នៅថ្ងៃសុក្រ (ទី២០ ខែកញ្ញា) នេះ ខណៈដែលទីក្រុងធំរបស់ប្រទេសចិន រងគ្រោះដោយព្យុះទីហ្វុងទី២ ដោយព្យុះនេះកើតមានឡើងប៉ុន្មានថ្ងៃបន្ទាប់ពីទីក្រុងនេះបានជួបប្រទះនឹងព្យុះដ៏ខ្លាំងបំផុតជាលើកដំបូង ក្នុងរយៈពេល ៧៥ឆ្នាំ។

យោងតាមទីភ្នាក់ងារសារព័ត៌មានរដ្ឋ Xinhua បានឲ្យដឹងថា ព្យុះទីហ្វុង Pulasan បានបោកបក់ដល់ដីគោក កាលពីយប់ថ្ងៃព្រហស្បតិ៍ (ទី១៩ ខែកញ្ញា) នៅក្នុងស្រុក Fengxian របស់ទីក្រុងនេះ ដោយមានល្បឿនខ្យល់អតិបរមា ៨៣គីឡូម៉ែត្រ ក្នុងមួយម៉ោង។

សារព័ត៌មាន Xinhua បានរាយការណ៍ថា ព្យុះនេះ «ត្រូវបានគេព្យាករថា នឹងថមថយកម្លាំងបន្តិចម្ដងៗ នៅពេលដែលវាបក់បោកកាន់តែឆ្ងាយពីសមុទ្រ» ទោះបីជាភ្លៀងនៅតែបន្តធ្លាក់ក្នុងទីក្រុងនេះ នាព្រឹកថ្ងៃសុក្រ (ទី២០ ខែកញ្ញា) នេះក៏ដោយ។

រូបភាពវីដេអូដែលត្រូវបានបង្ហោះនៅលើបណ្ដាញសង្គម នៅថ្ងៃទី២០ ខែកញ្ញានេះ បានបង្ហាញឲ្យឃើញអ្នកក្រុងសៀងហៃ បានដើរលុយទឹកលិចត្រឹមកំភួនជើង នៅក្នុងសង្កាត់មួយចំនួន ទោះបីជាមិនមានរបាយការណ៍ការពីខូចខាតធ្ងន់ធ្ងរ ឬអ្នកស្លាប់ និងរបួសក៏ដោយ។

ផ្នែកខ្លះនៃទីក្រុងសៀងហៃ បានបង្កើនកម្រិតប្រកាសអាសន្នព្យុះទីហ្វុង ខណៈដែលព្យុះបានបក់បោកជិតដល់ទីក្រុង កាលពីថ្ងៃទី១៩ ខែកញ្ញា។ ព្យុះ Pulasan កើតឡើងប៉ុន្មានថ្ងៃបន្ទាប់ពីព្យុះទីហ្វុង Bebinca បានបង្កការបំផ្លិចបំផ្លាញ កាលពីថ្ងៃទី១៦ ខែកញ្ញា ជាព្យុះដ៏ខ្លាំងបំផុតដែលទីក្រុងបានជួបប្រទះលើកដបំបូង ចាប់តាំងពីឆ្នាំ១៩៤៩ មក។ 

ព្យុះ Bebinca បានរលើងដើមឈើជាង ១.៨០០ដើម និងបានធ្វើឲ្យគ្រួសារ ៣០.០០០គ្រួសារ គ្មានអគ្គិសនីប្រើប្រាស់ ដោយអាជ្ញាធរបានជម្លៀសមនុស្សជាង ៤០០.០០០នាក់ នៅទូទាំងទីក្រុងសៀងហៃ មុនពេលមានព្យុះ៕