វេជ្ជបណ្ឌិតវ័យក្មេងដែលកំពុងធ្វើកូដកម្ម នៅក្នុងរដ្ឋ West Bengal របស់ឥណ្ឌា បានយល់ព្រមចាប់ផ្ដើមសេវាកម្មសំខាន់ៗឡើងវិញ ដែលជាការចាប់ផ្ដើមដោយផ្នែកៗឡើងវិញនៃទីកន្លែងព្យាបាល ប៉ុន្តែពួកគេនឹងនៅតែបន្តធ្វើកូដកម្មរបស់ខ្លួន ពាក់ព័ន្ធនឹងការរំលោភ និងសម្លាប់មិត្តរួមអាជីព កាលពី ១ខែមុន។

គួរបញ្ជាក់ថា ការរំលោភ និងសម្លាប់ លើគ្រូពេទ្យជាស្ត្រីវ័យ ៣១ឆ្នាំ នៅរដ្ឋ West Bengal ក្នុងខែសីហា បានបង្កឲ្យមានរលកនៃការតវ៉ា ដោយក្រុមគ្រូពេទ្យគ្រប់កម្រិត ដែលទាមទារឲ្យមានសុវត្ថិភាព នៅកន្លែងធ្វើការកាន់តែប្រសើរជាងមុន សម្រាប់ស្ត្រី និងទាមទារយុត្តិធម៌ឲ្យមិត្តរួមអាជីពរបស់ពួកគេ ដែលត្រូវបានសម្លាប់ ដោយជំរុញឲ្យតុលាការកំពូលរបស់ប្រទេសឥណ្ឌាបង្កើតក្រុមការងារសុវត្ថិភាព នៅមន្ទីរពេទ្យ។

វេជ្ជបណ្ឌិតវ័យក្មេង នឹងចាប់ផ្ដើមភារកិច្ចសំខាន់ៗឡើងវិញ ចាប់ពីថ្ងៃសៅរ៍ (ទី២១ ខែកញ្ញា)។ នេះបានបើតាមការឲ្យដឹងនៅក្នុងសេចក្ដីថ្លែងការណ៍ កាលពីថ្ងៃព្រហស្បតិ៍ (ទី១៩ ខែកញ្ញា) ពីរណសិរ្សវេជ្ជបណ្ឌិតវ័យក្មេងប្រចាំរដ្ឋ West Bengal ដែលតំណាងឲ្យគ្រូពេទ្យប្រហែល ៧.០០០នាក់ នៅក្នុងរដ្ឋនេះ។

សូមបញ្ជាក់ថា ពាក់ព័ន្ធនឹងករណីរំលោភ និងស្លាប់លើគ្រូពេទ្យ នៅក្នុងមហាវិទ្យាល័យវេជ្ជសាស្ត្រ និងមន្ទីរពេទ្យ R.G. Kar ក្នុងទីក្រុង Kolkata គេឃើញថា នគរបាលស្ម័គ្រចិត្តម្នាក់ត្រូវបានចាប់ខ្លួន ហើយអតីតនាយកសាលាក៏ត្រូវបានចាប់ខ្លួនដែរ ជុំវិញការចោទប្រកាន់ពីបទបំភ្លៃភស្តុតាង និងមានអំពើពុករលួយ ខណៈស្នងការនគរបាលនៃរដ្ឋធានី Kolkata ត្រូវបានដកចេញពីតំណែង៕