ប្រជាជនហុងគ្រី ក្នុងទីក្រុង Budapest បានប្រញ៉ាប់ប្រញ៉ាល់សាងសង់ប្រព័ន្ធការពារ កាលពីថ្ងៃព្រហស្បតិ៍ ខណៈទីក្រុងនេះបានត្រៀមទប់ទល់នឹងទឹកជំនន់ ដោយសារតែកម្រិតទឹកហក់ឡើងនៅទន្លេ Danube ។

ទន្លេ Danube នៅតែត្រូវបានគេរំពឹងថានឹងហក់ឡើងប្រហែលឬខ្ពស់ជាងបន្តិចលើសពី៨,៥ ម៉ែត្រ ដែលទំនងជានៅថ្ងៃសុក្រនេះ ឬថ្ងៃសៅរ៍ ស្អែក។

ទីក្រុង Budapest កំពុងត្រៀមសម្រាប់កម្ពស់ទឹកហក់ឡើងជិតដល់កម្រិតខ្ពស់បំផុត ហើយបានបិទកោះ Margaret ជាតំបន់កម្សាន្តដែលមានសណ្ឋាគារ និងភោជនីយដ្ឋានជាច្រើន។

ទឹកជំនន់ដ៏អាក្រក់បំផុត ដែលបានវាយលុកនៅអឺរ៉ុបកណ្តាលក្នុងរយៈពេលយ៉ាងហោចណាស់ពីរទសវត្សរ៍មកនេះ បានបន្សល់ទុកនូវការបំផ្លិចបំផ្លាញចាប់ពីប្រទេសរូម៉ានី រហូតដល់ប្រទេសប៉ូឡូញ ដោយមានដីល្បប់ និងកម្ទេចកម្ទីនៅក្នុងទីក្រុងនានា បំផ្លាញស្ពាន ជន់លិចរថយន្ត ដែលការខូចខាត នឹងឈានដល់ការខាតបង់រាប់ពាន់លានដុល្លារ។