ក្រុមហ៊ុនអាកាសចរណ៍ Brussels Airlines នៅថ្ងៃសុក្រ (ទី២០ ខែកញ្ញា) នេះ បាននិយាយថា ខ្លួននឹងលុបចោលជើងហោះហើរភាគច្រើនរបស់ខ្លួន នៅថ្ងៃទី១ ខែតុលា ដោយសារតែកូដកម្មទូទាំងប្រទេសរបស់បុគ្គលិកសន្តិសុខ នៅប្រទេសបែលហ្ស៊ិក។

អាកាសយានដ្ឋានប្រ៊ុចសែល ដែលជាអាកាសយានដ្ឋានធំជាងគេ នៅក្នុងប្រទេស បានស្នើឲ្យក្រុមហ៊ុនអាកាសចរណ៍ពិនិត្យមើលកាលវិភាគរបស់ខ្លួនឡើងវិញ ពីព្រោះការធ្វើកូដកម្ម នឹងនាំឲ្យមានការបន្ថយការត្រួតពិនិត្យសន្តិសុខ។

អាកាសយានដ្ឋាន បានឲ្យដឹងថា គេរំពឹងថា បុគ្គលិកសន្តិសុខមួយចំនួនធំ នឹងចូលរួមក្នុងកូដកម្ម ហើយបានព្យាករពីផលប៉ះពាល់ដ៏ធំលើប្រតិបត្តិការព្រលានយន្តហោះ នៅថ្ងៃនោះ។ មូលដ្ឋានរបស់ក្រុមហ៊ុនអាកាសចរណ៍ Brussels Airlines មានទីតាំងនៅអាកាសយានដ្ឋាន Brussels Airport ហើយជាក្រុមហ៊ុនអាកាសចរណ៍មួយ ក្នុងចំណោមក្រុមហ៊ុនអាកាសចរណ៍សំខាន់របស់ក្រុមហ៊ុន Lufthansa Group របស់ប្រទេសអាល្លឺម៉ង់។

អ្នកនាំពាក្យរបស់ក្រុមហ៊ុនអាកាសចរណ៍ Brussels Airlines បានប្រាប់ថា ខ្លួននឹងត្រូវលុបចោល ៨០ភាគរយនៃជើងហោះហើរចំនួន ២០៣វ៉ុលដែលបានគ្រោងទុករបស់ខ្លួន សម្រាប់ថ្ងៃនោះ។ 

គួរបញ្ជាក់ថា កូដកម្មនៅខែតុលា នឹងកើតមានឡើងមិនដល់មួយខែផង បន្ទាប់ពីចរាចរណ៍ជើងហោះហើរពីអាកាសយានដ្ឋាន Charleroi របស់ប្រទេសបែលហ្ស៊ិក ដែលជាមជ្ឈមណ្ឌលដ៏សំខាន់ សម្រាប់ក្រុមហ៊ុនអាកាសចរណ៍តម្លៃទាប Ryanair ត្រូវបានរំខានដោយសារកូដកម្មជាច្រើនថ្ងៃពីសំណាក់បុគ្គលិករបស់ព្រលានយន្តហោះនោះ៕