ប្រធានគណៈកម្មការសហភាពអឺរ៉ុប លោកស្រី Ursula von der Leyen នៅថ្ងៃសុក្រ (ទី២០ ខែកញ្ញា០ នេះ បានប្រកាសថា សហភាពអឺរ៉ុប (EU) នឹងផ្តល់ប្រាក់កម្ចីរហូតដល់ ៣៥ពាន់លានអឺរ៉ូ (៣៩ពាន់លានដុល្លារ) ដល់អ៊ុយក្រែន ដើម្បីជួយប្រទេសនេះ ដែលជាប់នៅក្នុងសង្គ្រាមជាមួយរុស្ស៊ី។

ប្រាក់កម្ចីដែលត្រូវបានប្រកាស ខណៈពេលដែលប្រធានគណៈកម្មការរបស់ប្លុកនេះ កំពុងធ្វើទស្សនកិច្ច នៅទីក្រុងគីវ គឺជាផ្នែកមួយនៃផែនការដ៏ទូលំទូលាយ ក្នុងចំណោមប្រទេស G7 (ប្រទេសឧស្សហកម្មលូតលាស់ទាំង៧) ដើម្បីរៃអង្គាសថវិកា ដោយប្រើប្រាស់ប្រាក់ចំណូលពីទ្រព្យសម្បត្តិរបស់រុស្ស៊ីដែលត្រូវបានបង្កក ដើម្បីជាការដាក់ទណ្ឌកម្មដល់ប្រទេសនេះ ដោយសារការលុកលុយប្រទេសជិតខាង។ 

តាមរយៈការបង្ហោះនៅលើបណ្ដាញសង្គម X លោកស្រី von der Leyen បានឲ្យដឹងថា៖ «ការវាយប្រហារឥតឈប់ឈររបស់រុស្ស៊ី មានន័យថា អ៊ុយក្រែនត្រូវការការបន្តគាំទ្រពី EU»។

គួរបញ្ជាក់ថា អ៊ុយក្រែនកំពុងប្រឈមនឹងតម្រូវការហិរញ្ញវត្ថុដ៏ធំ បន្ទាប់ពីមានសង្គ្រាមយ៉ាងខ្លាំងក្លាជាង ២ឆ្នាំ ដែលបានបំផ្លិចបំផ្លាញហេដ្ឋារចនាសម្ព័ន្ធរបស់ខ្លួន។

ក្រុមប្រទេស G7 បានបង្កកទ្រព្យសម្បត្តិហិរញ្ញវត្ថុរបស់រុស្ស៊ី ដែលមានតម្លៃប្រហែល ៣០០ពាន់លានដុល្លារ ភ្លាមៗបន្ទាប់ពីមានការលុកលុយរបស់ទីក្រុងមូស្គូលើអ៊ុយក្រែន ក្នុងឆ្នាំ២០២២។ ពួកគេបានសន្យាថា នឹងប្រើប្រាស់មូលនិធិ ដើម្បីជួយសម្ព័ន្ធមិត្តរបស់ពួកគេ ប៉ុន្តែបានចំណាយពេលជាច្រើនខែ ដើម្បីពិភាក្សា អំពីរបៀបដែលយន្តការបែបនេះ អាចដំណើរការបាន៕