នៅថ្ងៃសុក្រនេះ ប្រធានាធិបតីចិនលោក Xi Jinping បានស្វាគមន៍ព្រះមហាក្សត្រម៉ាឡេស៊ីព្រះចៅស៊ុលតង់ Ibrahim នៅក្នុងទីក្រុងប៉េកាំង សម្រាប់ដំណើរយាងទស្សនកិច្ចផ្លូវរដ្ឋលើកដំបូងរបស់ទ្រង់មកកាន់ប្រទេសចិន ចាប់តាំងពីព្រះអង្គឡើងគ្រងរាជសម្បត្តិប្រទេសនៅអាស៊ីអាគ្នេយ៍មួយនេះ កាលពីដើមឆ្នាំនេះ ។

 អំឡុងជំនួបនាពេលនោះ លោក Xi សន្យាពង្រឹងកិច្ចសហប្រតិបត្តិការរវាងចិន និងម៉ាឡេស៊ី ។

 ព្រះអង្គម្ចាស់ Ibrahim មានបន្ទូលប្រាប់លោក Xiថា គោលនយោបាយបរទេសរបស់ម៉ាឡេស៊ី តែងតែពេញចិត្តនឹងភាពជាដៃគូដ៏រឹងមាំជាមួយប្រទេសចិន ។

 យោងតាមការអះអាងរបស់ក្រសួងការបរទេសម៉ាឡេស៊ី បានឲ្យដឹងថា ប្រមុខរាជវង្សមកពីរដ្ឋភាគខាងត្បូង Johor អង្គនេះ អមដំណើរដោយរដ្ឋមន្រ្តីក្រសួងដឹកជញ្ជូន និងរដ្ឋមន្រ្តីក្រសួងដែនដី ។ ព្រះអង្គគ្រោងនឹងមានជំនួបជាមួយនាយករដ្ឋមន្រ្តីចិនលោក Li Qiang ផងដែរ ។ 

 វាគឺជាដំណើរយាងទស្សនកិច្ចលើកដំបូងទៅកាន់ប្រទេសចិន ដោយព្រះមហាក្សត្រម៉ាឡេស៊ី ក្នុងរយៈពេល ១០ឆ្នាំកន្លងមកនេះ ។

 ព្រះអង្គម្ចាស់ Ibrahim ត្រូវបានឡើងគ្រងរាជ្យសម្បត្តិជាព្រះមហាក្សត្រទី ១៧របស់ម៉ាឡេស៊ីកាលពីខែមករាកន្លងទៅ ក្រោមរបបរាជានិយមតែមួយគត់ ជាទីដែលប្រមុខរាជវង្សទាំង ៩ស្រឡាយ របស់ម៉ាឡេស៊ី ត្រូវផ្លាស់វេនគ្រងរាជ្យសម្បត្តិ រាល់ ៥ឆ្នាំម្តង ហើយស្ថិតនៅលើនយោបាយ ៕