ការស៊ើបអង្កេតរបស់អង្គភាពសេវាសម្ងាត់របស់សហរដ្ឋអាមេរិក បានរកឃើញពីគម្លាតទំនាក់ទំនង និងកង្វះការយកចិត្តទុកដាក់ នៅមុនការប៉ុនប៉ងធ្វើឃាតបេក្ខជនប្រធានាធិបតីរបស់គណបក្សសាធារណរដ្ឋ លោក Donald Trump កាលពីខែកក្កដា នៅក្នុងការជួបជុំមួយនៅទីក្រុងបាត់ល័( Butler) រដ្ឋ Pennsylvania ។

លោក Ronald Rowe នាយកអង្គភាពសេវាសម្ងាត់ស្តីទី បានប្រាប់អ្នកសារព័ត៌មានកាលពីថ្ងៃសុក្រ ទី២០ ខែ កញ្ញាថា «ការមិនខ្វល់ខ្វាយរបស់ភ្នាក់ងារមួយចំនួន» បាននាំឱ្យមានការរំលោភលើពិធីសារសន្តិសុខ ហើយ បុគ្គលិកទីភ្នាក់ងារនឹងនាំយកមកឲ្យទទួលខុសត្រូវ។

លោក Rowe បាននិយាយដោយបដិសេធមិនផ្តល់ព័ត៌មានជាក់លាក់ ថា «ការពិន័យទាំងនេះ នឹងត្រូវបានគ្រប់គ្រងតាមដំណើរការវិន័យរបស់យើង»។ ការប៉ុនប៉ងធ្វើឃាតលើ លោក Trump នៅក្នុងការជួបជុំ កាលពីថ្ងៃទី១៣ ខែកក្កដា បាននាំឱ្យមានការរិះគន់យ៉ាងទូលំទូលាយចំពោះអង្គភាពសេវាសម្ងាត់និងការលាលែងពីតំណែងរបស់អតីតនាយករបស់អង្គភាព។ 

លោក Rowe បានការពារសកម្មភាពរបស់អង្គភាពសេវាសម្ងាត់ នៅក្នុងការប៉ុនប៉ងធ្វើឃាតជាក់ស្តែងដាច់ដោយឡែកមួយផ្សេងទៀតលើលោក Trump នៅក្លឹបវាយកូនហ្គោលរដ្ឋ Florida របស់លោក កាលពីថ្ងៃអាទិត្យ។ ជនសង្ស័យ ត្រូវបានកំណត់អត្តសញ្ញាណឈ្មោះ Ryan Routh អាយុ៥៨ឆ្នាំ បានរត់គេចខ្លួន។ ក្រោយមកត្រូវបានចាប់ខ្លួននិងបានចោទប្រកាន់ពីបទកាន់កាប់កាំភ្លើង។ បុរសរូបនេះ ត្រូវបានគេរំពឹងថានឹងបង្ហាញខ្លួននៅក្នុងតុលាការសហព័ន្ធនៅ West Palm Beach រដ្ឋ Florida នៅថ្ងៃចន្ទ។

លោក Rowe បាននិយាយថា លោក Trump កំពុងទទួលបានការការពារក្នុងកម្រិតដូចគ្នានឹងប្រធានាធិបតី លោក Joe Biden និងបេក្ខជនប្រធានាធិបតីរបស់គណបក្សប្រជាធិបតេយ្យ អនុប្រធានាធិបតី លោកស្រី Kamala Harris ដែលជាគូប្រជែងរបស់លោក នៅក្នុងការបោះឆ្នោត នៅថ្ងៃទី៥ ខែវិច្ឆិកា។