​អាមេរិក៖ ប្រធានាធិបតី​លោក ​Joe Biden បាន​ទទួល​ស្វាគមន៍​មេដឹកនាំ​នៃ​សម្ព័ន្ធមិត្ត​ឥណ្ឌូ​-​ប៉ាស៊ីហ្វិកដែល​ត្រូវ​បាន​គេ​ស្គាល់​ថា ​“Quad” នៅ​សេត​វិមាន​កាលពី​ថ្ងៃ​សុក្រ ខណៈ​ដែល​លោកបានបញ្ចប់​នូវ​សប្តាហ៍​ដ៏​លំបាក​នៃ​ផ្នែក​ការទូត​ ដែល​លោក​ប្រឈម​ទៅ​នឹង​ការរិះគន់​ពីទាំង​សម្ព័ន្ធមិត្ត និង​សត្រូវ​។

កិច្ចប្រជុំ​ជាមួយ​មេដឹកនាំ​មកពី​ប្រទេស​ឥណ្ឌា ជប៉ុន និង​អូស្ត្រាលីបាន​ផ្តល់​ឱកាស​ឱ្យ​លោក Biden ផ្តោត​ការ​យក​ចិត្ត​ទុក​ដាក់​លើ​គោលដៅ​គោលនយោបាយ​ការបរទេស​ដ៏​សំខាន់​មួយ គឺ​ការ​យក​ចិត្ត​ទុក​ដាក់​កាន់​តែ​ខ្លាំង​ចំពោះ​តំបន់​ប៉ាស៊ីហ្វិក ដោយ​ផ្អែកលើ​អ្វី​ដែល​សហរដ្ឋអាមេរិក​មើល​ឃើញ​ថា ជា​ការ​អនុវត្តន៍​សេដ្ឋកិច្ច​ដោយ​បង្ខំ​របស់​ប្រទេស​ចិន ​និង​ការ​ធ្វើ​សម​យុទ្ធ​យោធា​មិនបាន​សម្របសម្រួល​នៅ​ក្នុង​តំបន់​។ នាយករដ្ឋមន្ត្រី​ឥណ្ឌា លោក Narendra Modi បាន​និយាយ​ថា ​កិច្ចប្រជុំកំពូល​សន្តិសុខ​ទាំង ​៤​ប្រទេស​ (Quad) នឹង​ដើរតួ​ជា​កម្លាំង​ដើម្បី​ផលប្រយោជន៍​សកល​។ មេដឹកនាំ​ទាំង​បួន​ត្រូវបាន​គេ​រំពឹងថា ប្រកាស​ពី​គំនិត​ផ្តួចផ្តើម​វ៉ាក់សាំង​បង្ការ​វីរុស COVID-19, ផែនការ​ពង្រឹង​ខ្សែចង្វាក់​ផ្គត់ផ្គង់​ឧបករណ៍​អេឡិចត្រូនិក និង​កម្មវិធីដើម្បីនាំ​និស្សិត​បញ្ចប់​ការសិក្សា​ផ្នែក​វិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា​ទៅកាន់ សាកលវិទ្យាល័យ​សហរ​ដ្ឋ​អាមេរិក​។

ប៉ុន្តែ​មេដឹកនាំ​ទាំង​ ៤ ក៏ត្រូវ​បាន​គេ​រំពឹងថា ពិភាក្សាអំពីសន្តិសុខ​នៅក្នុង​តំបន់​ឥណ្ឌូ​-​ប៉ាស៊ីហ្វិក ជាពិសេស​ខណៈ​ប្រទេស​ចិន​បន្ត​បង្ហាញកម្លាំង​នៅក្នុង​តំបន់​ទាក់ទង​ទៅនឹង​កោះ​តៃវ៉ាន់​។ នាយករដ្ឋមន្ត្រី​អូស្ត្រាលី ​លោក Scott Morrison និយាយថា ​យើង​ឈរ​នៅទីនេះ​ជាមួយគ្នា​នៅក្នុង​តំបន់​ឥណ្ឌូ​-​ប៉ាស៊ីហ្វិក ជា​តំបន់ដែល​យើង​ប្រាថ្នា​ចង់​មាន​សេរីភាព​ពី​ការ​បង្ខិតបង្ខំ​ ដែល​សិទ្ធិ​ដែន​អធិបតេយ្យភាព​របស់ប្រជាជាតិ​ទាំងអស់​ត្រូវបាន​គោរ​ព ហើយ​ជា​កន្លែង​ដែល​ជម្លោះ​ត្រូវបាន​ដោះស្រាយដោយសន្តិវិធី និង​ស្របតាម​ច្បាប់​អន្តរជាតិ​៕

អត្ថបទ៖ ប៊ុន ថន