រដ្ឋមន្ត្រីការពារជាតិអ៊ីស្រាអែល លោក Yoav Gallant បាននិយាយបន្ទាប់ពីការវាយប្រហាររបស់អ៊ីស្រា    អែលលើទីក្រុងបេរូត (Beirut)ដែលបានសម្លាប់មេបញ្ជាការហេសបូឡាជាច្រើននាក់ថា  យោធាអ៊ីស្រា  អែលនឹងបន្តប្រតិបត្តិការនៅតំបន់ភាគខាងជើង រហូតដល់អ្នកស្រុកទាំងអស់ដែលត្រូវបានជម្លៀសចេញពីតំបន់ព្រំដែន ចំពេលមានការវាយប្រហារដោយគ្រាប់ផ្លោងរបស់ក្រុមហេសបូឡាពីភាគខាងត្បូងលីបង់ អាចត្រឡប់ទៅផ្ទះសម្បែងរបស់ពួកគេវិញ។

លោកបានសរសេរនៅលើទំព័រ X របស់ខ្លួនថា៖«សូម្បីតែនៅក្នុងទីក្រុង Dehieh (សង្កាត់បេរូត (Beirut) ដែលក្រុមហេសបូឡាមានការិយាល័យរបស់ខ្លួន) នៅក្នុងទីក្រុងបេរូត យើងនឹងបន្តដេញចាប់សត្រូវរបស់យើង ដើម្បីការពារប្រជាពលរដ្ឋរបស់យើង។ ប្រតិបត្តិការនេះដែលជាផ្នែកមួយនៃដំណាក់កាលថ្មី [នៃយុទ្ធនាការយោធារបស់អ៊ីស្រាអែល] នឹងបន្ត រហូតដល់គោលដៅរបស់យើងបានសម្រេច គឺអ្នកស្រុកនៅភាគខាងជើង[អ៊ីស្រាអែល]វិលត្រឡប់ទៅផ្ទះសម្បែងរបស់ពួកគេវិញ។ 

កងកម្លាំងការពារអ៊ីស្រាអែល (IDF) បាននិយាយនៅមុននេះថា ការវាយប្រហារដ៏ជាក់លាក់មួយ ត្រូវបានធ្វើឡើងទៅលើទីក្រុងបេរូតដែលបានសម្លាប់មេបញ្ជាការកងជីវពលហេសបូឡាស៊ីអ៊ីតលោក Ibrahim Aqil និងមេបញ្ជាការហេសបូឡាជាច្រើននាក់ផ្សេងទៀត ដែលកំពុងរៀបចំផែនការវាយប្រហារលើតំបន់ភាគខាងជើងរបស់អ៊ីស្រាអែល។