​អាមេរិក៖ មន្ត្រី​មូលដ្ឋាន​ និង​សហព័ន្ធនិយាយថា គ្មាន​ជន​ចំណាកស្រុក​នៅសល់​ទៀត​ទេ​នៅ​ជំរំព្រំដែន​រដ្ឋ​តិច​សាស់ ដែល​មនុស្ស​ជិត ​១៥.០០០នាក់ភាគច្រើន​ជា​ជនជាតិ​ហៃ​ទីបានប្រមូលផ្តុំ​គ្នា​ប៉ុន្មាន​ថ្ងៃ​មុននេះ ដើម្បី​ស្វែងរក​សិទ្ធិ​ជ្រកកោន​។

រដ្ឋមន្ត្រីក្រសួង​សន្តិសុខ លោក Alejandro Mayorkas បាន​និយាយ​កាលពី​ថ្ងៃ​សុក្រ​ថា ​សហរដ្ឋអាមេរិកបានអនុញ្ញាតឱ្យ​មនុស្ស​ប្រមាណ ​១២.៤០០​នាក់​ចូលក្នុង​ប្រទេស​ក្នុង​លក្ខខណ្ឌ​បណ្តោះអាសន្ន ខណៈពេលដែល​ពួកគេ​ធ្វើការ​ទាមទារ​នៅ​ចំពោះមុខ​តុលាការ​អន្តោប្រវេសន៍ ដើម្បី​ស្នាក់នៅក្នុង​ប្រទេសក្រោម​ច្បាប់​សិទ្ធិ​ជ្រកកោន​ ឬ​សម្រាប់​ហេតុផល​ផ្លូវច្បាប់ផ្សេងទៀត​។ ជន​អន្តោ​ប្រវេ​ស​ន៍​អាច​ត្រូវបាន​គេ​បដិសេធ​ហើយនឹង​ត្រូវ​ឲ្យ​ចាកចេញ​។ ជន​អន្តោ​ប្រវេ​ស​ន៍មួយចំនួន​ត្រូវបាន​គេ​នាំទៅ​ទីក្រុង ​Houston រដ្ឋ​តិច​សាស់ ដើម្បី​ទទួលបានដំណើរការគ្រប់គ្រង​ដោយ​សមាគមជាតិ​វិហារ​សាសនា​គ្រឹ​ស្ត​។

ទន្ទឹមនឹង​នេះដែរ ប្រជាជន​ហៃ​ទី​ជាច្រើន​នាក់ ​និង​អ្នកគាំទ្រ​របស់​ពួកគេបាន​ប្រមូល​ផ្តុំគ្នាកាល​ពី​ថ្ងៃ​សុក្រ​នៅ​កណ្តាល​ទីក្រុង Boston រដ្ឋ Massachusetts ដោយ​បង្ហាញ​ពី​ការខកចិត្តរបស់​ពួកគេ ចំពោះការប្រព្រឹត្ត​ទៅលើ​ជន​ចំណាកស្រុក​ហៃ​ទីនៅ​ព្រំដែន​ប្រទេស​ម៉ិចស៊ិក និង​បានទាមទារឱ្យ​រដ្ឋបាល​ប្រធានាធិបតីលោក Joe Biden បញ្ឈប់​ការ​និរទេសពួកគេត្រឡប់​ទៅ​ប្រទេសកំណើត​ដែល​គ្មាន​ស្ថិរភាព។ ​ក្រុមមនុស្ស​ជាង ​១០០​នាក់នៅ​ខាង​មុខ​អគារ​សហព័ន្ធ John F. Kennedy បាន​កាន់​បដាស​សេ​រថា “​បញ្ហា​ជីវិត​ប្រជាជន​ហៃ​ទី​” និង​ស្រែក​ខ្លាំងៗ​ថា បញ្ឈប់​ការដឹកជញ្ជូន យើង​សមនឹង​ទទួលបាន​ភាពប្រសើរ​ជាង​នេះ​៕​

អត្ថបទ៖ ប៊ុន ថន