របបសឹកនិយាយកាលពីថ្ងៃសៅរ៍ថា ចំនួនមនុស្សស្លាប់សរុបនៅសហភាពមីយ៉ាន់ ក្រោយព្យុះទីហ្វុង Yagi បានកើនឡើងដល់ ៣៨៤នាក់ ក្នុងនោះ មនុស្ស ៨៩នាក់កំពុងបាត់ខ្លួន ។

គួរឲ្យដឹងថា ព្យុះ Yagi បានបោកបក់លើតំបន់ភាគខាងជើងវៀតណាម ប្រទេសឡាវ និងមីយ៉ាន់ម៉ា កាលពីរយៈពេលជាង ១សប្តាហ៍មុន បង្កឲ្យមានទឹកជំនន់ និងបំណាក់ដី ដែលបានសម្លាប់មនុស្សរាប់រយនាក់នៅទូទាំងតំបន់ ។

ក្រុមព័ត៌មានរបស់របបសឹក និយាយថា នៅមីយ៉ាន់ម៉ា មនុស្ស ៣៨៤នាក់ បានស្លាប់ និងមនុស្ស ៨៩នាក់ផ្សេងទៀត បាត់ខ្លួន គិតត្រឹមថ្ងៃសៅរ៍ ។

ទឹកជំនន់ បានបង្កទុក្ខលំបាកកាន់តែធ្ងន់លើប្រទេសមួយនេះ ជាទីដែលមនុស្សរាប់លាននាក់ បានជម្លៀសខ្លួនរួចទៅហើយ ដោយសារជម្លោះរយៈពេលជាង ៣ឆ្នាំ បណ្តាលមកពីរដ្ឋប្រហារឆ្នាំ ២០២១របស់យោធាមីយ៉ាន់ម៉ា ។

កាលពីសប្តាហ៍មុន របបសឹក បានធ្វើការអំពាវនាវដ៏កម្រសុំជំនួយអន្តរជាតិ ដើម្បីជួយដោះស្រាយគ្រោះមហន្តរាយធម្មជាតិនេះ ។

អង្គការសហប្រជាជាតិ(UN)បានព្រមានថា មនុស្សរហូតដល់ ៨៨៧.០០០នាក់ បានរងផលប៉ះពាល់នៅមីយ៉ាន់ម៉ា ដោយសារព្យុះទីហ្វុង Yagi ៕