ទូរទស្សន៍រដ្ឋបាននិយាយនៅថ្ងៃអាទិត្យ (២២ កញ្ញា) នេះថា ការផ្ទុះឧស្ម័ននៅក្នុងអណ្តូងរ៉ែធ្យូងថ្មមួយនៅក្នុងខេត្ត ខូរ៉ាសាន (Khorasan) ភាគខាងត្បូងរបស់ប្រទេសអ៊ីរ៉ង់ បានសម្លាប់មនុស្សយ៉ាងហោចណាស់ ៥១នាក់ និងរបួស ២០នាក់។

ទូរទស្សន៍រដ្ឋបាននិយាយថា គ្រោះថ្នាក់នេះបណ្តាលមកពីការផ្ទុះឧស្ម័នមេតាននៅក្នុងប្លុក B និង C នៃអណ្តូងរ៉ែ ដែលដំណើរការដោយក្រុមហ៊ុន ម៉ាដានចូ (Madanjoo) ដោយមានកម្មករ ៦៩នាក់កំពុងធ្វើការនៅពេលការផ្ទុះកើតឡើង។ 

ប្រតិបត្តិការសង្រ្គោះនៅប្លុក B បានបញ្ចប់ និងបានចាប់ផ្ដើមនៅប្លុក C។ ប្រព័ន្ធផ្សព្វផ្សាយរដ្ឋនិយាយថា ការផ្ទុះនេះបានកើតឡើងនៅវេលាម៉ោង ៩យប់ (ម៉ោងក្នុងស្រុក) នៅថ្ងៃសៅរ៍។

លោកប្រធានាធិបតី ម៉ាស៊ូដ ប៉េហ្សេស្គីអាន (Masoud Pezeshkian) បានសម្តែងការរំលែកទុក្ខដល់ក្រុមគ្រួសារជនរងគ្រោះ ដោយថ្លែងក្នុងការអត្ថាធិប្បាយតាមទូរទស្សន៍ថា៖ «ខ្ញុំបាននិយាយជាមួយបណ្ដារដ្ឋមន្ត្រី ហើយយើងនឹងប្រឹងប្រែងឱ្យអស់ពីសមត្ថភាពដើម្បីតាមដានលើហេតុការណ៍នេះ»៕