ជំនួយអន្តរជាតិបន្ថែមទៀតបានទៅដល់ប្រទេសបូលីវី កាលពីថ្ងៃសៅរ៍ (២១ កញ្ញា) នៅតំបន់ភាគកណ្តាល សាន់តា គ្រូស (Santa Cruz) ដែលជាតំបន់មួយរងគ្រោះខ្លាំងបំផុតដោយរលកនៃចំហេះព្រៃដ៏មហន្តរាយបានបំផ្លិចបំផ្លាញប្រទេសតំបន់ភ្នំអង់មួយនេះ។

ប្រធានាធិបតីបូលីវី លោក លូអ៊ីស អារសេ ( Luis Arce) បាននិយាយនៅលើបណ្ដាញសង្គម X របស់ខ្លួនថា អាកាសយានដ្ឋាន Santa Cruz បានទទួលយន្តហោះទម្លាក់ទឹក អេឡិកត្រា ធែងឃើ ៤៨១ (Electra Tanker 481) ដែលមានសមត្ថភាពផ្ទុកទឹកបាន ១១.៣០០លីត្រ មកពីកាណាដា និងឧទ្ធម្ភាគចក្រ អ៊ែរបើស ប៊ីខេ១១៧ ឌី៣ (Airbus BK117 D3) ដែលមានសមត្ថភាពផ្ទុកទឹកបាន ១.០០០លីត្រ ពីមូលនិធិ Airbus របស់បារាំង។

លោក Arce ក៏បានលើកឡើងផងដែរថា អ្នកពន្លត់អគ្គិភ័យអេស្ប៉ាញ ៤០នាក់ និងអ្នកជំនាញ ៨នាក់ មកពីអេស្ប៉ាញ បានមកដល់ដើម្បីជំរុញការទប់ទល់អណ្តាតភ្លើង។ ជំនួយរបស់អឺរ៉ុប ត្រូវបានសម្របសម្រួលដោយ ក្រុមអឺរ៉ុប (Team Europe) ដែលរួមមាន សហភាពអឺរ៉ុប និងស្ថានទូតរបស់បណ្ដាប្រទេសជាសមាជិក ហើយត្រូវបានដំណើរការតាមរយៈយន្តការការពារជនស៊ីវិលរបស់សហភាពអឺរ៉ុប។

កាណាដា និងសហភាពអឺរ៉ុប បានចូលរួមជាមួយប្រទេសផ្សេងទៀត ដូចជាប្រេស៊ីល និងវេណេហ្ស៊ុយអេឡា ក្នុងការបញ្ជូនការគាំទ្រដល់បូលីវី ដើម្បីប្រយុទ្ធប្រឆាំងនឹងអណ្តាតភ្លើង។ ប្រទេសតំបន់ភ្នំអង់មួយនេះកំពុងជួបប្រទះឆ្នាំនៃចំហេះដ៏អាក្រក់ ដែលកាន់តែធ្ងន់ធ្ងរឡើងដោយគ្រោះរាំងស្ងួត និងយុទ្ធនាការសំអាតដីធ្លី ដែលទាក់ទងនឹងការរីកដុះដាលនៃការចិញ្ចឹមសត្វពាហនៈ និងផលិតកម្មគ្រាប់ធញ្ញជាតិ៕