គណបក្ស ជម្រើសថ្មីសម្រាប់អាល្លឺម៉ង់ (AfD) ស្ដាំនិយមជ្រុល ត្រូវបានគេព្យាករថានឹងឈរនៅលេខរៀងទីមួយ ក្នុងការបោះឆ្នោតនៅរដ្ឋ ប្រានឌិនប៊ែក (Brandenburg) នៅថ្ងៃអាទិត្យ (២២ កញ្ញា) នេះ ដោយស្វះស្វែងបង្កើនការមានប្រៀបនៅក្នុងរដ្ឋភាគខាងកើតមួយផ្សេងទៀតក្នុងខែនេះ ហើយបានផ្តួលក្រុមអ្នកប្រជាធិបតេយ្យសង្គមនិយម របស់លោកអធិការបតី អូឡា សូស (Olaf Scholz) ដែលធ្លាប់តែឈរនៅក្នុងទីតាំងដ៏រឹងមាំរហូតមក។

បក្ស AfD បានក្លាយជាបក្សស្តាំនិយមជ្រុលដំបូងគេដែលឈ្នះការបោះឆ្នោតថ្នាក់តំបន់នៅអាល្លឺម៉ង់ ចាប់តាំងពីសង្គ្រាមលោកលើកទីពីរមក នៅរដ្ឋ ធូរីងងិន (Thuringia) កាលពីថ្ងៃទី០១ ខែកញ្ញា ហើយទើបតែតាមពីក្រោយអ្នកលេខរៀងទីមួយយ៉ាងប្រកៀកប្រកិត នៅរដ្ឋ ហ្សាកសិន (Saxony)។ 

បក្សនេះគឺជាក្រុមមួយក្នុងចំណោមក្រុមស្តាំនិយមជ្រុលមួយចំនួននៅអឺរ៉ុប ដែលបោះទុនលើក្ដីបារម្ភជុំវិញការធ្លាក់ចុះនៃសេដ្ឋកិច្ច អន្តោប្រវេសន៍ និងសង្រ្គាមអ៊ុយក្រែន ដែលជាកង្វល់ដ៏ខ្លាំងក្លាជាពិសេសនៅក្នុងអតីតតំបន់ដែលគ្រប់គ្រងដោយកុម្មុយនិស្តភាគខាងកើតរបស់អាល្លឺម៉ង់។

គណបក្ស ដែលទំនងជាមិនអាចគ្រប់គ្រងការិយាល័យបានទេដោយសារតែមិនមានសំឡេងភាគច្រើនហើយមកពីបក្សផ្សេងទៀតមិនព្រមធ្វើការជាមួយនេះ ក៏កំពុងស្វះស្វែងរកការគាំទ្រពីអ្នកដែលមិនសប្បាយចិត្តជុំវិញការប៉ះទង្គិចគ្នានៅក្នុងក្រុមចម្រុះសហព័ន្ធត្រីភាគីរបស់លោក Scholz ។ ជ័យជម្នះរបស់បក្ស AfD នៅក្នុងការបោះឆ្នោតរដ្ឋ នឹងជាការអាម៉ាស់មួយសម្រាប់បក្សប្រជាធិបតេយ្យសង្គមនិយម (SPD) ដែលបានឈ្នះការបោះឆ្នោតនៅរដ្ឋ Brandenburg និងគ្រប់គ្រងតំបន់ដែលមានប្រជាជន ២,៥លាននាក់មួយនេះ ចាប់តាំងពីការបង្រួបបង្រួមក្នុងឆ្នាំ១៩៩០មក៕