ការចូលរួមថែរក្សាសន្តិភាព គឺជាតម្លៃមូលដ្ឋានគ្រឹះក្នុងការអភិវឌ្ឍប្រទេសជាតិ នេះគឺជាការ​លើក​ឡើង​របស់ លោកស្រី ស្រូយ សុជាតិ អគ្គនាយ នៃអគ្គនាយកដ្ឋានយុវជន និងជា​ប្រធាន​ស្នងការ​កាយឫទ្ធិ​ជាតិ​កម្ពុជា នៅក្នុងពិធីបើកសិក្ខាសាលាស្តីពីអ្នកនាំសារសន្តិភាពដើម្បីសហគមន៍ខ្ញុំ និង​ផ្សព្វ​ផ្សាយ​ទិវាសន្តិភាពអន្តរជាតិ” កាលពីថ្ងៃទី២១ ខែកញ្ញា ឆ្នាំ២០២៤ នៅវិទ្យាល័យ ហ៊ុន សែន មិត្ដភាព ក្រុងព្រះសីហនុ ។

លោកស្រី ស្រូយ សុជាតិ បន្ដថា គោលបំណងលើកកម្ពស់ការយល់ដឹងជាសាកលអំពី គុណ​តម្លៃ​ដ៏​វិសេសវិសាលនៃសន្តិភាព និងបង្ហាញពីឆន្ទះដ៏ខ្ជាប់ខ្ជួនបន្តកសាង និងថែរក្សាសន្តិភាព ស្ថិរភាព​ឱ្យ​បានគង់វង្ស ឋិតស្ថេរយូរអង្វែង និងយល់ច្បាស់ពីតម្លៃនៃសន្តិភាព ដែល​ជា​មូលដ្ឋាន​គ្រឹះ​ក្នុង​ការ​អភិវឌ្ឍ​ប្រទេសជាតិ។

លោកស្រីបន្តថា ការរៀបចំសិក្ខាសាលារយៈពេលបីថ្ងៃ ពីថ្ងៃទី២១ ដល់ ថ្ងៃ២៣ ខែកញ្ញានេះ គឺ​មាន​សារៈ​សំខាន់ចំពោះប្អូនៗយុវជនកាយរិទ្ធចំនួន ១៧២នាក់ នៃកងឯកភាព​ទាំង​បី​វិទ្យាល័យ​ក្នុង​ក្រុង​ព្រះសីហនុ បានចូលរួមសិក្សាក្នុងវគ្គសិក្ខាសាលានៅពេលនេះ។ ហើយ​សម្រាប់​អង្គការ​សហ​ប្រជាជាតិបានអនុម័តយកថ្ងៃទី២១ ខែកញ្ញ ជារៀងឆ្នាំ សម្រាប់​ពិភពលោក​ប្រារព្ធ​ទិវា​សន្តិភាព​អន្តរជាតិ ដើម្បីឧទ្ទិសដល់ការពង្រឹងឧត្តមគតិសន្តិភាព សំរាប់ប្រជាជន និង​បណ្តា​ប្រទេស​ទាំងអស់នៅទូទាំងសកលលោក។

លោកស្រី បន្ថែមថា ដោយឡែកនៅក្នុងប្រទេសកម្ពុជា ការនាំយកសុខសន្តិភាពពេញលេញ និង​ការឯកភាពជាតិជូនប្រជាពលរដ្ឋកម្ពុជា រយៈពេលជិត ២៥ឆ្នាំ ចាប់តាំងពីថ្ងៃទី២៩ ខែធ្នូ ឆ្នាំ​១៩៩៨ ការបញ្ចប់សង្គ្រាមនៅលើទឹកដីមាតុភូមិកម្ពុជា ដោយ «នយោបាយឈ្នះ-ឈ្នះ» រាជ​រដ្ឋាភិបាល​កម្ពុជា បានកំណត់ យកថ្ងៃទី២៩ ខែធ្នូ ជារៀងរាល់ឆ្នាំ ជា “ទិវាសន្តិភាពនៅកម្ពុជា" ដែល​ជា​ថ្ងៃបុណ្យជាតិផ្លូវការ។ ក្រោយពីទទួលបាននូវការបង្រួបបង្រួមជាតិពិតប្រាកដប្រទេសកម្ពុជាមានសុខសន្តិភាពពេញលេញ​ទូទាំងប្រទេស និងមានការរីកចម្រើននៅលើគ្រប់វិស័យគួរជាទីមោទនៈ។ ដូច​នេះ​ទាំង​អស់​គា្ន​ត្រូវ​ការ​សន្តិភាព ស្រលាញ់សន្តិភាព និងរួមគ្នាការពារសន្តិភាព ពាក្យថា សន្តិភាព និង​អរគុ​ណ​សន្តិភាព​បានក្លាយទៅជាពាក្យស្លោកសម្រាប់ប្រជាជនកម្ពុជាគ្រប់ស្រទាប់វណ្ណៈ៕