អាជ្ញាធរសុខាភិបាលដែលមានមូលដ្ឋាននៅតំបន់ហ្កាហ្សា បាននិយាយនៅក្នុងសេចក្តីថ្លែងការណ៍មួយកាលពីថ្ងៃសៅរ៍ (២១ កញ្ញា) ថា ចំនួនអ្នកស្លាប់របស់ប៉ាឡេស្ទីន ពីការវាយប្រហារដែលកំពុងបន្តរបស់អ៊ីស្រាអែល នៅក្នុងតំបន់ហ្កាហ្សា បានកើនឡើងដល់ ៤១.៣៩១នាក់ និងរបួស ៩៥.៧៦០នាក់ ។ ក្នុងរយៈពេលប៉ុន្មានថ្ងៃកន្លងមកនេះ ប្រតិបត្តិការយោធាអ៊ីស្រាអែល នៅតំបន់ហ្កាហ្សា បានសម្លាប់មនុស្ស ១១៩នាក់ និងរបួស ២០៩នាក់ នេះបើយោងតាមសេចក្តីថ្លែងការណ៍។

អាជ្ញាធរសុខាភិបាលបាននិយាយថា កាលពីថ្ងៃសៅរ៍ផងដែរនោះ យ៉ាងហោចណាស់ជនជាតិប៉ាឡេស្ទីន ២២នាក់ ត្រូវបានសម្លាប់ និង ៣០នាក់ ផ្សេងទៀតបានរងរបួសនៅក្នុងការវាយប្រហារតាមអាកាសរបស់អ៊ីស្រាអែល ទៅលើសាលារៀនមួយដែលដាក់ជនភៀសខ្លួននៅភាគខាងត្បូងទីក្រុងហ្កាហ្សា ក្នុងតំបន់ ហ្ស៊ីទួន (Zeitoun) ហើយអ្នកស្លាប់បាត់បង់ជីវិតភាគច្រើនជាស្ត្រី និងកុមារ។

ទន្ទឹមនឹងនេះ អ្នកនាំពាក្យកងទ័ពអ៊ីស្រាអែល លោក អាវីឆាយ អាដ្រែ (Avichay Adraee) បាននិយាយនៅក្នុងសេចក្តីថ្លែងការណ៍មួយថា យន្តហោះចម្បាំងរបស់កងទ័ពអាកាស ដោយមានការណែនាំពីចារកម្ម បានវាយប្រហារក្រុមសកម្មប្រយុទ្ធ ហាម៉ាស ដែលកំពុងប្រតិបត្តិការនៅក្នុងអគារបញ្ជាការ និងគ្រប់គ្រងនៅក្នុងសាលារៀនមួយក្នុងទីក្រុងហ្កាហ្សា។

គួររម្លឹកថា អ៊ីស្រាអែល បានបើកការវាយលុកទ្រង់ទ្រាយធំប្រឆាំងនឹងក្រុមហាម៉ាស នៅតំបន់ហ្កាហ្សាស្ទ្រីប ដើម្បីសងសឹកនឹងការវាយលុករបស់ក្រុមហាម៉ាស ឆ្លងកាត់ព្រំដែនភាគខាងត្បូងអ៊ីស្រាអែល កាលពីថ្ងៃទី០៧ ខែតុលា ឆ្នាំ២០២៣ ក្នុងអំឡុងពេលដែលមនុស្សប្រហែល ១.២០០នាក់ត្រូវបានសម្លាប់ និងប្រហែល ២៥០នាក់ត្រូវបានចាប់ធ្វើជាចំណាប់ថ្នូរ៕