​បាល់ទាត់៖ លោក Keisuke Honda អ្នកចាត់ការ​ទូទៅ​ក្រុម​ជម្រើសជាតិ​កម្ពុជាបានចាត់ទុក​ពូ​ល B នៃ​ពានរង្វាន់ AFF Suzuki Cup 2020 គឺជា​ពូ​ល​មានការ​ប្រកួត​ជែង​ខ្លាំង តែ​លោក​នឹង​ខំប្រឹងដើម្បី​ដឹកនាំ​ក្រុម​ឡើង​វគ្គ​បន្ដនៃ​ពានរង្វាន់​ប្រចាំ​តំបន់​អាស៊ាន​មួយ​នេះ។​

​ការលើកឡើង​របស់​អតីត​ជម្រើសជាតិ​ជប៉ុន​រូបនេះ បន្ទាប់ពី​កម្ពុជាត្រូវបាន​ចាប់ឆ្នោត​ស្ថិតក្នុង​ពូ​ល B នៃ​ពានរង្វាន់​បាល់ទាត់​ជើងឯក​អាស៊ីអាគ្នេយ៍ជាមួយ​វៀតណាម ម៉ាឡេស៊ី ឥណ្ឌូនេស៊ី និង​ឡាវកាលពី​ថ្មីៗ ខណៈ​ពូ​ល A គឺមាន​ថៃ មី​យ៉ាន់​ម៉ា ហ្វីលីពីន សិង្ហ​បុរី និង​ក្រុម​ឆ្លង​ផុត​ការប្រកួត​ជម្រុះ Play-Off រវាង​ប្រ៊ុយណេ និង​ទី​ម័​រ​ខាងកើត។​ ​លោក Honda បាន​និយាយថា ដូច​បងប្អូន​បានដឹង​ហើយពី​លទ្ធផល​ការចាប់​ឆ្នោត​ពានរង្វាន់ Suzuki Cup មាន​ប្រទេស​ខ្លាំងៗច្រើន​ក្នុង​ពូ​ល​ជាមួយ​កម្ពុជា។ តែ​យ៉ាងណា​លោក​សប្បាយចិត្ត និង​រំភើប​ចំពោះ​ការប្រកួត​មួយ​នេះនៅ​ខែធ្នូ​ខាងមុខ។ លោក​ដឹងថា វា​ជាការ​ប្រកួតប្រជែង​ដែល​តានតឹង តែ​ក្រុម​គោព្រៃ​កម្ពុជា​នឹង​ប្រឹងប្រែងដើម្បី​អាចឈាន​ទៅ​វគ្គ​បន្ទាប់។​

​តែ​ដើម្បី​ឈានទៅ​សម្រេច​គោលដៅ​មួយ​នេះ ក្រុម​ជម្រើសជាតិ​កម្ពុជាគឺ​ត្រូវ​ការគាំទ្រ និង​ការជំរុញ​ទឹកចិត្ត​ពី​សំណាក់​បង​ប្រជាពលរដ្ឋ ហើយ​ពួកគេ​នឹង​ខិតខំ​ប្រឹង​ឲ្យ​អស់ពី​សមត្ថភាពដើម្បី​អ្នកគាំទ្រ និង​ប្រជាជន​កម្ពុជា​ទាំងអស់គ្នា។ នេះ​បើតាម​ការបញ្ជាក់​របស់​លោក Keisuke Honda តាមរយៈ​សហព័ន្ធ​កីឡាបាល់ទាត់​កម្ពុជាពី​ប្រទេស​លី​ទុយ​អា​នី ដែល​លោក​កំពុង​ប្រកប​អាជីព។​ ​គួរ​ដឹងថា ពានរង្វាន់ AFF Suzuki Cup 2020 គ្រោង​ប្រកួត​ពីថ្ងៃ​ទី​០៥ ខែធ្នូដល់​ថ្ងៃទី​០១ ខែមករា ឆ្នាំ​២០២២ ប៉ុន្ដែ​បេក្ខភាព​ម្ចាស់ផ្ទះនៅ​មិនទាន់​សម្រេច​នោះទេ ដោយ​សហព័ន្ធ​កីឡាបាល់ទាត់​អាស៊ីអាគ្នេយ៍នឹង​រៀបចំ​កិច្ចប្រជុំ​ថ្ងៃនេះ ដើម្បី​សម្រេច​ផ្ដល់​សិទ្ធ​ឲ្យ​ប្រទេស​ណាមួយ ក្នុងចំណោម​បេក្ខភាព​ដែល​បានដាក់​ពាក្យ​ដេញថ្លៃ​ធ្វើ​ម្ចាស់ផ្ទះ​ព្រឹត្តិការណ៍ ២​ឆ្នាំ​ម្ដងនេះក្នុងនោះ​ក៏មាន​ប្រទេស​កម្ពុជា​ផងដែរ៕

​អត្ថបទ៖ លី ឈុន​ឡា