អនុប្រធានាធិបតីសហរដ្ឋអាមេរិក លោកស្រី Kamala Harris នាំមុខគូប្រជែងមកពីគណបក្សសាធារណរដ្ឋរបស់ខ្លួន លោក Donald Trump ជាច្រើនពិន្ទុ នៅក្នុងការស្ទង់មតិថ្មីរបស់ទូរទស្សន៍ NBC News ដែលបានចេញផ្សាយកាលពីថ្ងៃអាទិត្យ(២២ កញ្ញា) ដោយបានរកឃើញថា អ្នកឆ្លើយតបកាន់តែពេញចិត្តលោកស្រី Harris ចាប់តាំងពីលោកស្រីបានក្លាយជាបេក្ខភាពប្រធានាធិបតីបក្សប្រជាធិបតេយ្យមក។

ចំនួន ៤៨% នៃអ្នកបោះឆ្នោតដែលបានចុះឈ្មោះសរុបចំនួន ១.០០០នាក់ ក្នុងការស្ទង់មតិដែលបានធ្វើឡើងនៅថ្ងៃទី១៣-១៧ ខែកញ្ញា បាននិយាយថាទស្សនៈរបស់ពួកគេចំពោះលោកស្រី Harris មានភាពវិជ្ជមានបើធៀបនឹងតួលេខ ៣២% កាលពីខែកក្កដា ដែលជាកំណើនដ៏ធំបំផុតក្នុងចំណោមការវាយតម្លៃលើអ្នកនយោបាយ ដែលត្រូវបានស្ទង់មតិដោយ NBC ចាប់តាំងពីឆ្នាំ២០០១ មក។

បណ្តាញព័ត៌មាននេះនិយាយថា នៅពេលសួរអំពីលោក Trump ចំនួនត្រឹមតែ ៤០% ប៉ុណ្ណោះនៃអ្នកឆ្លើយតបនៅក្នុងស្ទង់មតិនេះបាននិយាយថាពួកគេមានទស្សនៈវិជ្ជមានលើលោក ធៀបនឹងចំនួន ៣៨% នៅក្នុងខែកក្កដា។ ការស្ទង់មតិរបស់ CBS News ដាច់ដោយឡែកក៏បានរកឃើញថា លោកស្រី Harris នាំមុខលោក Trump ចំនួន ៤ពិន្ទុ ក្នុងតួលេខ ៥២% ទល់នឹង ៤៨% ក្នុងចំណោមអ្នកបោះឆ្នោត។

ការរកឃើញនេះគឺមានលក្ខណៈទូលំទូលាយស្របនឹងការស្ទង់មតិជាតិនាពេលថ្មីៗនេះ រួមទាំងការស្ទង់មតិដោយ Reuters/Ipsos ដែលបង្ហាញពីការប្រកួតប្រជែងដ៏ជិតស្និទ្ធមុនការបោះឆ្នោតនៅថ្ងៃទី០៥ ខែវិច្ឆិកា។ ខណៈពេលដែលការស្ទង់មតិថ្នាក់ជាតិផ្តល់សញ្ញាសំខាន់ៗនៃទស្សនៈរបស់អ្នកបោះឆ្នោត លទ្ធផលស្ទង់មតិតាមរដ្ឋប្រទាញប្រទង់ ទំនងជាកំណត់អ្នកឈ្នះពិតប្រាកដ៕