ក្រុមអ្នកតវ៉ា បានចេញធ្វើបាតុកម្មឆ្លងកាត់ទីក្រុង Sao Paulo របស់ប្រទេសប្រេស៊ីល កាលពីថ្ងៃអាទិត្យ ដោយអំពាវនាវឱ្យមានវិធានការដើម្បីទប់ទល់នឹងបម្រែបម្រួលអាកាសធាតុ និងបានរិះគន់ឧស្សាហកម្មកសិកម្ម នៅក្នុងប្រទេស។

ការតវ៉ានេះ គឺជាផ្នែកមួយនៃការប្រមូលផ្តុំជាបន្តបន្ទាប់ ដែលបានចាប់ផ្តើមតាំងពីថ្ងៃសុក្រ នៅទូទាំងប្រទេស ហើយត្រូវបានអំពាវនាវដោយអង្គការមួយចំនួន ដូចជាអង្គការ Greenpeace Brazil និង អង្គការ Jovens pelo Clima ជាដើម។

ប្រធានាធិបតីប្រេស៊ីល លោក លូអ៊ីស អ៊ីណាស៊ីញ៉ូ លូឡា ដា ស៊ីវ៉ា(Luiz Inacio Lula da Silva) បាននិយាយកាលពីថ្ងៃអាទិត្យថា គោលដៅនៃការឈានទៅដល់ការអភិវឌ្ឍន៍ប្រកបដោយនិរន្តរភាព គឺមានហានិភ័យនៃការប្រែទៅជា «ការបរាជ័យរួមដ៏ធំ» ក្នុងអំឡុងពេលកិច្ចប្រជុំកំពូលនៅពេលអនាគតដែលត្រូវធ្វើឡើងនៅអង្គការសហប្រជាជាតិ។

យោងតាមប្រព័ន្ធផ្សព្វផ្សាយក្នុងស្រុកបានឲ្យថា ការតវ៉ាគាំទ្របរិស្ថាន នឹងកំណត់បន្តរហូតដល់ខែតុលា។