នាយករដ្ឋមន្ត្រីស្រីលង្កា លោក ឌីណេស គូណាវ៉ាឌីណា (Dinesh Gunawardena) បាននិយាយនៅថ្ងៃចន្ទ (២៣ កញ្ញា) នេះថា លោកបានលាលែងពីតំណែង មួយថ្ងៃបន្ទាប់ពីលោក អាណារុ គូម៉ារុ ឌីសាណាយ៉ាកិ (Anura Kumara Dissanayake) ដែលជាអ្នកកាន់អំណាចឆ្វេងនិយម បានឈ្នះការបោះឆ្នោតប្រធានាធិបតីនៅក្នុងប្រទេសមហាសមុទ្រឥណ្ឌា ដែលរួមរឹតដោយបំណុលមួយនេះ។

លោក គូណាវ៉ាឌីណា វ័យ ៧៥ឆ្នាំ បានឡើងកាន់តំណែងជានាយករដ្ឋមន្ត្រី នៅខែកក្កដា ឆ្នាំ២០២២ បន្ទាប់ពីលោកអតីតប្រធានាធិបតី ហ្គោតាប៉ាយ៉ា រ៉ាចាប៉ាក់សា (Gotabaya Rajapaksa) បានភៀសខ្លួនចេញពីប្រទេសហើយបានលាលែងពីតំណែង ជុំវិញការតវ៉ាដ៏រីករាលដាលដោយសារវិបត្តិសេដ្ឋកិច្ចដ៏អាក្រក់បំផុតក្នុងរយៈពេលជាច្រើនទសវត្សរ៍។

ការបោះឆ្នោតកាលពីថ្ងៃអាទិត្យនេះបានមើលឃើញថា លោក ឌីសាណាយ៉ាកិ បានផ្ដួលប្រធានាធិបតីបច្ចុប្បន្ន គឺលោក រ៉ានិល វីក្រឹមម៉ាស៊ិងហេ (Ranil Wickremesinghe) ដែលត្រូវបានតែងតាំងដោយសភាដើម្បីបម្រើការបន្តឱ្យអាណត្តិដែលនៅសល់របស់លោក រ៉ាចាប៉ាក់សា។

លោក គូណាវ៉ាឌីណា បាននិយាយនៅក្នុងការបង្ហោះនៅលើបណ្ដាញសង្គម X ថា៖ «ខ្ញុំសូមជម្រាបជូនដោយក្ដីគោរពថា ខ្ញុំបានលាលែងពីតំណែងជានាយករដ្ឋមន្ត្រី» ដោយថ្លែងអំណរគុណដល់លោក វីក្រឹមម៉ាស៊ិងហេ សម្រាប់ការគាំទ្រក្នុងអំឡុងពេលកាន់តំណែងរបស់លោក។ ប្រព័ន្ធផ្សព្វផ្សាយបាននិយាយថា លោក គូណាវ៉ាឌីណា បានផ្ញើការលាលែងរបស់លោកទៅកាន់ប្រធានាធិបតីជាប់ឆ្នោត លោក ឌីសាណាយ៉ាកិ រួចរាល់ហើយ៕